CUID I.

Reamhraiteach agus Ginearalta.

1. —Féadfar Acht na nAltran, 1950 , a ghairm den Acht seo.

2. —San Acht seo—

ciallaíonn an abairt “Acht 1944” Acht na mBan Cabhartha, 1944 (Uimh. 10 de 1944) ;

ciallaíonn an abairt “an Bord” An Bord Altranais a bunaítear leis an Acht seo;

ciallaíonn an abairt “an Coiste” Coiste na mBan Cabhartha a bunaítear leis an Acht seo;

ciallaíonn an abairt “comhlucht díscaoilte” aon chomhlucht is ceann acu seo a leanas—

(a) an Phríomh-Chomhairle Bhanaltrais, nó

(b) Príomh-Bhord na mBan Cabhartha;

ciallaíonn an abairt “an dáta bunuithe” an dáta a ceapfar ina dháta bunuithe chun críocha an Achta seo le hordú ón Aire arna dhéanamh faoi alt 3 den Acht seo;

tá leis an abairt “údarás sláinte” an bhrí atá léi san Acht Sláinte, 1947 (Uimh. 28 de 1947) ;

ciallaíonn an abairt “údarás maoirseachta áitiúil” údarás maoirseachta áitiúil chun críocha Achta 1944;

ciallaíonn an abairt “bean chabhartha” duine a bheas cláraithe i roinn na mban cabhartha;

ciallaíonn an abairt “roinn na mban cabhartha” an roinn de chlár na n-altran a bhaineas le mná cabhartha;

ciallaíonn an abairt “an tAire” an tAire Sláinte;

ciallaíonn an focal “altra” duine a bheas cláraithe i gclár na n-altran agus folaíonn sé bean chabhartha agus folaíonn an focal “altranas” asaoideacht;

ciallaíonn an briathar “ordú” ordú le rialacha;

ciallaíonn an abairt “clár na n-altran” an clár d'altraí a choimeádfas an Bord faoi alt 41 den Acht seo;

ciallaíonn an focal “rialacha” rialacha arna ndéanamh faoi alt 21 den Acht seo.

3. —Féadfaidh an tAire, le hordú, lá a cheapadh chun bheith ina dháta bunuithe chun críocha an Achta seo.

4. —Na caiteachais faoina raghaidh an tAire ag riaradh an Achta seo, déanfar, a mhéid a cheadós an tAire Airgeadais, iad d'íoc as airgead a sholáthrós an tOireachtas.

5. —(1) Déantar leis seo na hachtacháin a luaitear sa dara colún den Sceideal a ghabhas leis an Acht seo d'athghairm a mhéid a sonraítear sa tríú colún den Sceideal sin.

(2) Tiocfaidh fo-alt (1) den alt seo i ngníomh ar an dáta bunuithe.

6. —Ar an dáta bunuithe déanfar an Phríomh-Chomhairle Bhanaltrais agus Príomh-Bhord na mBan Cabhartha a dhíscaoileadh de bhuaidh an ailt seo.