AN CHÉAD SCEIDEAL

Rialacha Maidir Le Méid Cúitimh a Chinneadh

Ailt 5 agus 11.

1. Déanfar, faoi réir fhorálacha an Sceidil seo, an laghdú luacha a chinneadh faoi threoir na difríochta idir réamhluach agus luach iardain na talún, i gcás—

(a) gurb é réamhluach na talún an méid a d'fhéadfaí a bheith ag súil a réadódh an talamh dá ndíolfadh díoltóir toilteanach ar an margadh oscailte é díreach roimh an gcinneadh iomchuí faoi Chuid IV den Phríomh-Acht (agus ag glacadh leis nach mbeadh an t-iarratas iomchuí ar chead déanta), agus

(b) gurb é luach iardain na talún an méid a d'fhéadfaí a bheith ag súil a réadódh an talamh dá ndíolfadh díoltóir toilteanach ar an margadh oscailte é díreach tar éis an chinnidh sin.

2. Le linn réamhluach agus luach iardain na talún a bheith á chinneadh chun críocha Riail 1—

(a) tabharfar aird—

(i) ar aon ranníoc a d'fhéad nó a d'fhéadfadh údarás pleanála a éileamh mar réamhchoinníoll le forbairt na talún,

(ii) ar aon srian le forbairt na talún a d'fhéadfadh a bheith forchurtha, nó a d'fhéadfaí a fhorchur, gan ceart chun cúitimh a thabhairt, faoi aon Acht nó faoi aon ordú, rialacháin, riail nó fodhlí a rinneadh faoi aon Acht,

(iii) ar an bhfíoras go bhféadfadh sé go ndearnadh forbairt dhíolmhaithe ar an talamh nó go bhféadfar an fhorbairt sin a dhéanamh amhlaidh, agus

(iv) ar mhargadhluach oscailte aon talún inchomórtais, más ann dó, i gcomharsanacht na talún a bhfuil a luachanna á gcinneadh;

(b) ní chuirfear i gcuntas—

(i) aon chuid de luach na talún is inchurtha i leith fóirdheontas nó deontas atá ar fáil as airgead poiblí, nó i leith aon liúntas cánach nó rátúcháin i leith forbartha, a d'fhéadfadh dul chun tairbhe d'fhorbairt na talún,

(ii) oiriúnacht nó oiriúnaitheacht speisialta na talún chun críche ar bith mura bhféadfaí an talamh a úsáid chun na críche sin ach amháin de bhun cumhachtaí reachtúla, nó más críoch í nach bhfuil margadh ar bith ann di ach amháin riachtanais speisialta ceannaitheora áirithe nó riachtanais aon chomhlachta reachtúil de réir mar a mhínítear i Riail 5; ar choinníoll go gcuirfear i gcuntas aon tairiscint bona fide chun an talamh a cheannach a chuirfear ar a iúl don eadránaí,

(iii) aon mhéadú ar luach na talún is inchurtha i leith a úsáide, nó i leith úsáide aon déanmhais air, ar shlí a bhféadfadh aon chúirt srian a chur léi, nó atá contrártha don dlí nó a dhéanann dochar do shláinte áitritheoirí an déanmhais nó do shláinte nó sábháilteacht an phobail nó don timpeallacht,

(iv) aon laghdú nó méadú luacha is inchurtha i leith an talamh, nó aon talamh sa chomharsanacht, a chur in áirithe chun críche áirithe i bplean forbartha,

(v) aon luach is inchurtha i leith aon déanmhais neamhúdaraithe nó aon úsáide neamhúdaraithe,

(vi) (I) tograí a bheidh ann le haghaidh forbairt na talún nó aon talún eile ag comhlacht reachtúil, nó

(II) go mb'fhéidir nó gur dócha go dtiocfaidh an talamh nó talamh eile faoi réir scéime forbartha a rachaidh an comhlacht reachtúil sin ina bun, agus

(c) féadfar breithniú a dhéanamh ar gach tuairisceán agus measúnacht ar luach caipitiúil chun críocha cánachais a rinne nó lenar thoiligh an t-éilitheoir.

3. (1) Le linn na féidearthachtaí, más ann, ó thaobh fhorbairt na talún a bheith á measúnú d'fhonn réamhluach na talún sin a chinneadh, ní thabharfar aird ach amháin ar cibé féidearthachtaí réasúnacha a bhféadfaí a mheas, ag féachaint do na cúinsí ábhartha uile, gurbh ann dóibh díreach roimh an gcinneadh iomchuí faoi Chuid IV den Phríomh-Acht.

(2) Gan dochar do ghinearáltacht na fo-rialach roimhe seo, áireofar ar na cúinsí ábhartha chun críocha na fo-rialach sin—

(a) cineál agus suíomh na talún,

(b) cé acu is cosúil nó nach cosúil, de réir mar a bheidh, go bhfaighfí cead, nó cead breise, chun an talamh a fhorbairt ag féachaint d'fhorálacha an phlean fhorbartha,

(c) an toimhde go ndéanfaí, dá dtabharfaí aon chead chun an talamh a fhorbairt, aon choinníollacha a fhorchur a d'fhéadfaí le réasún a fhorchur i ndáil le nithe dá dtagraítear sa Cheathrú Sceideal (ach nach bhforchuirfí aon choinníollacha eile), agus

(d) aon chead chun an talamh a fhorbairt, nach cead le haghaidh forbartha de chineál a shonraítear in alt 13 (2), a bhí ar marthain cheana féin tráth an chinnidh iomchuí faoi Chuid IV den Phríomh-Acht.

4. (1) Le linn luach iardain na talún a bheith á chinneadh i gcás inar diúltaíodh cead a thabhairt—

(a) toimhdeofar, faoi réir fho-riail (2), nach dtabharfaí, tar éis an diúltaithe, cead faoi Chuid IV den Phríomh-Acht le haghaidh forbairt ar bith de chineál a shonraítear in alt 13 (2),

(b) tabharfar aird ar aon choinníollacha i ndáil le nithe dá dtagraítear sa Cheathrú Sceideal (ach ní ar aon choinníollacha eile) a d'fhéadfaí le réasún a fhorchur le linn cead a thabhairt chun an talamh a fhorbairt.

(2) I gcás inar diúltaíodh cead a thabhairt i ndáil le talamh a bhfuil gealltanas i bhfeidhm ina leith faoi Chuid VI den Phríomh-Acht, toimhdeofar, le linn luach iardain na talún a bheith á chinneadh, nach dtabharfaí cead faoi Chuid IV den Phríomh-Acht, tar éis an diúltaithe, le haghaidh forbairt ar bith seachas forbairt lena mbaineann an gealltanas sin.

5. (1) I Riail 2, ciallaíonn “comhlacht reachtúil”:

(a) Aire den Rialtas,

(b) Coimisinéirí na nOibreacha Poiblí in Éirinn,

(c) údarás áitiúil de réir bhrí an Achta Rialtais Áitiúil, 1941 ,

(d) údarás cuain de réir bhrí an Achta Cuanta, 1946 ,

(e) bord sláinte arna bhunú faoin Acht Sláinte, 1970 ,

(f) coiste gairmoideachais de réir bhrí an Achta Oideachais Ghairme Beatha, 1930 ,

(g) bord nó comhlacht eile arna bhunú le reacht nó faoi reacht,

(h) cuideachta a bhfuil na scaireanna go léir inti á sealbhú ag Aire den Rialtas, nó thar a cheann, nó ag stiúrthóirí arna gceapadh aige, nó

(i) cuideachta a bhfuil na scaireanna go léir inti á sealbhú ag bord, ag cuideachta, nó ag comhlacht eile dá dtagraítear i mír (g) nó (h).

(2) I bhfo-riail (1) (h) agus (i), ciallaíonn “cuideachta” cuideachta de réir bhrí alt 2 d'Acht na gCuideachtaí, 1963 .