CUID I

Réamhráiteach

1. —(1) Féadfar an tAcht Sláinte (Údarás Sláinte Réigiúnach an Oirthir), 1999 , a ghairm den Acht seo.

(2) Féadfar na hAchtanna Sláinte, 1947 go 1999, a ghairm de na hAchtanna Sláinte, 1947 go 1996, den Acht Sláinte (Faisnéis a Sholáthar), 1997, agus den Acht seo le chéile agus forléireofar le chéile iad mar aon ní amháin.

2. —(1) San Acht seo—

ciallaíonn “Acht 1993” Acht an Ard-Reachtaire Cuntas agus Ciste (Leasú), 1993;

ciallaíonn “an tÚdarás” Údarás Sláinte Réigiúnach an Oirthir arna bhunú faoi alt 7 ;

ciallaíonn “Bardas Bhaile Átha Cliath” Ard-Mhéara Ró-Onórach, Seanóirí agus Buirgéisigh Bhaile Átha Cliath;

ciallaíonn “an lá bunaithe” an lá a cheapfaidh an tAire faoi alt 3 chun bheith ina lá bunaithe;

forléireofar “feidhm feidhmiúcháin” de réir alt 4 (arna leasú le halt 24) d'Acht Uimh. 3 de 1996;

folaíonn “feidhmeanna” cumhachtaí agus dualgais, agus folaíonn tagairt do chomhlíonadh feidhmeanna, maidir le cumhachtaí agus dualgais, tagairt d'fheidhmiú na gcumhachtaí agus do chomhlíonadh na ndualgas;

ciallaíonn “údarás áitiúil”—

(a) i gcás contae riaracháin, comhairle an chontae, agus

(b) i gcás contaebhuirge, bardas na contaebhuirge;

tá le “toghlimistéar áitiúil” an bhrí a shanntar dó le halt 13 den Acht Rialtais Áitiúil, 1994;

folaíonn “comhalta den fhoireann” oifigeach agus seirbhíseach;

ciallaíonn “an tAire” an tAire Sláinte agus Leanaí;

ciallaíonn “Acht Uimh. 3 de 1996” an tAcht Sláinte (Leasú) (Uimh. 3), 1996;

ciallaíonn “forordaithe” forordaithe le rialacháin arna ndéanamh ag an Aire;

ciallaíonn “an Príomh-Acht” an tAcht Sláinte, 1970 ;

ciallaíonn “ceardchumainn agus comhlachais aitheanta” na ceardchumainn agus na comhlachais foirne a n-aithníonn an tÚdarás iad chun críche caibidlí a bhaineann le haistriú foirne chuig an Údarás chomh maith le luach saothair, coinníollacha fostaíochta nó dálaí oibre oifigeach nó seirbhíseach don Údarás;

ciallaíonn “fiaclóir cláraithe” duine a bhfuil a ainm nó a hainm taifeadta i gClár na bhFiaclóirí, seachas duine atá cláraithe go díomuan faoi alt 28 d'Acht na bhFiaclóirí, 1985 ;

ciallaíonn “poitigéir agus drugadóir urghnaimh cláraithe” duine a bhfuil a ainm nó a hainm taifeadta i gclár na bpoitigéirí agus na ndrugadóirí urghnaimh arna chothabháil ag Cumann Cógaiseoirí na hÉireann;

ciallaíonn “lia-chleachtóir cláraithe” duine a bhfuil a ainm nó a hainm cláraithe i gClár Ginearálta na Lia-Chleachtóirí, seachas duine atá cláraithe go sealadach faoi alt 28 d'Acht na Lia-Chleachtóirí, 1978 , nó atá cláraithe go díomuan faoi alt 29 d'Acht na Lia-Chleachtóirí, 1978;

ciallaíonn “altra chláraithe” duine a bhfuil a ainm nó a hainm taifeadta i gclár na n-altraí arna chothabháil ag an mBord Altranais faoi alt 27 d'Acht na nAltraí, 1985 ;

ciallaíonn “poitigéir cógaisíochta cláraithe” duine a bhfuil a ainm nó a hainm taifeadta i gclár na bpoitigéirí cógaisíochta arna chothabháil ag Cumann Cógaiseoirí na hÉireann;

ciallaíonn “altra shíciatrach chláraithe” duine a bhfuil a ainm nó a hainm taifeadta sa roinn shíciatrach de chlár na n-altraí arna chothabháil ag an mBord Altranais faoi alt 27 d'Acht na nAltraí, 1985 ;

tá le “feidhm fhorchoimeádta” an bhrí a shanntar dó le hAcht Uimh. 3 de 1996 (arna leasú le halt 24);

ciallaíonn “seirbhísí” seirbhísí sláinte agus seirbhísí sóisialta pearsanta a fhéadfaidh bord sláinte a sholáthar;

ciallaíonn “comhlacht saorálach” comhlacht saorálach a sholáthraíonn seirbhís, nó a bheartaíonn seirbhís a sholáthar, ar seirbhís í atá comhchosúil nó coimhdeach le seirbhís a fhéadfaidh bord sláinte a sholáthar;

ciallaíonn “ospidéal saorálach” ospidéal a mhaoinítear go substaintiúil trí chomhshocraíocht leis an Údarás nó le Bord Sláinte Limistéir faoi alt 10 agus nach é an tÚdarás nó Bord Sláinte Limistéir nó aon choiste díobh an comhlacht rialaithe air;

ciallaíonn “soláthraí saorálach seirbhíse míchumais intleachtúil” soláthraí seirbhísí míchumais intleachtúil a mhaoinítear go substaintiúil trí chomhshocraíocht leis an Údarás nó le Bord Sláinte Limistéir faoi alt 10 agus nach é an tÚdarás nó Bord Sláinte Limistéir nó aon choiste díobh an comhlacht rialaithe air;

ciallaíonn “soláthraí saorálach seirbhíse” comhlacht saorálach a sholáthraíonn seirbhís trí chomhshocraíocht leis an Údarás nó le Bord Sláinte Limistéir de réir alt 10 .

(2) San Acht seo—

(a) aon tagairt d'alt nó do Sceideal, is tagairt í d'alt den Acht seo nó do Sceideal a ghabhann leis an Acht seo, mura gcuirtear in iúl gur tagairt d'achtachán éigin eile atá beartaithe,

(b) aon tagairt d'fho-alt, do mhír nó d'fhomhír, is tagairt í don fho-alt, don mhír nó don fhomhír den fhoráil ina bhfuil an tagairt, mura gcuirtear in iúl gur tagairt d'fhoráil éigin eile atá beartaithe, agus

(c) déanfar tagairt d'achtachán a fhorléiriú mar thagairt don achtachán sin arna leasú, arna oiriúnú nó arna leathnú le haon achtachán ina dhiaidh sin nó faoi, lena n-áirítear an tAcht seo.

3. —(1) Déanfaidh an tAire, le hordú, lá a cheapadh chun bheith ina lá bunaithe chun críocha an Achta seo.

(2) Níl feidhm ag alt 24 d'Acht Uimh. 3 de 1996 maidir le hordú a dhéanfar faoin alt seo.

4. —Gach ordú a dhéanfar faoi alt 5 agus gach rialachán a dhéanfar faoi ailt 11(2),16(1) agus 21(14), déanfar é a leagan faoi bhráid gach Tí den Oireachtas a luaithe is féidir tar éis a dhéanta agus, má dhéanann ceachtar Teach acu sin laistigh den 21 lá ina dhiaidh sin a shuífidh an Teach sin tar éis an t-ordú nó an rialachán a leagan faoina bhráid rún a rith ag neamhniú an ordaithe nó an rialacháin, beidh an t-ordú nó an rialachán ar neamhní dá réir sin, ach sin gan dochar do bhailíocht aon ní a rinneadh roimhe sin faoin ordú nó faoin rialachán.

5. —(1) Féadfaidh an tAire, le hordú, tar éis dul i gcomhairle leis an Aire Comhshaoil agus Rialtais Áitiúil agus leis an údarás áitiúil lena mbaineann, an Chéad Sceideal a leasú.

(2) Féadfaidh an tAire, le hordú, ar iarraidh ón Údarás agus faoi réir fho-alt (3), an Dara Sceideal a leasú trí ábhar a chur leis nó a scriosadh as.

(3) Sula ndéanfar tagairt do dhuine a scriosadh as an Dara Sceideal, rachaidh an tAire i gcomhairle leis an duine sin.

6. —(1) Aisghairtear leis seo na nithe seo a leanas, le héifeacht ón lá bunaithe—

(a) fo-ailt (6) agus (7) d'alt 13 den Phríomh-Acht, agus

(b) alt 18 den Acht Rialtais Áitiúil (Baile Átha Cliath), 1993.

(2) Cúlghairtear leis seo Rialachán 4 de na Rialacháin um Boird Sláinte, 1970 (I.R. Uimh. 170 de 1970), le héifeacht ón lá bunaithe.