CUID VI

Ilghnéitheach

Dícháiliú a chur ar ceal.

27. —(1) Aon duine a ndéanfar ordú ina leith faoi fho-alt (1) d'alt 18 nó fo-alt (2) d'alt 26 den Acht seo, féadfaidh sé, aon uair tar éis trí mhí a bheith caite ó dháta an ordaithe agus ó am go ham, iarratas a dhéanamh chun na Cúirte a rinne an t-ordú á iarraidh an dícháiliú a forchuireadh leis an ordú a chur ar ceal, agus ar aon iarratas den sórt sin féadfaidh an Chúirt, más cuí léi é, ag féachaint do charachtar an duine a dícháilíodh, dá iompar tar éis an t-ordú a dhéanamh, don chineál ciona a bhí ann agus d'iomthoscaí eile an cháis, an dícháiliú a chur ar ceal, le hordú, amhail ó cibé dáta a shonrófar san ordú.

(2) Má dhiúltaítear d'iarratas faoi fho-alt (1) den alt seo, ní ghéillfear d'iarratas eile faoi má dhéantar é laistigh de thrí mhí ó dháta an diúltaithe.

Marú Muc.

1935, Uimh. 45 .

28. —Chun críocha an Achta um Ainmhithe do Mharbhadh, 1935 , forléireofar “uirlis” mar ní a fholaíonn córas gásála.