CUID I

Réamhráiteach agus Ginearálta

Gearrtheideal agus comhlua.

1. —(1) Féadfar an tAcht Forbartha Móna, 1998 , a ghairm den Acht seo.

(2) Féadfar na hAchtanna Forbartha Móna, 1946 go 1998, a ghairm de na hAchtanna Forbartha Móna, 1946 go 1995, agus den Acht seo le chéile.

Léiriú.

2. —(1) San Acht seo mura n-éilíonn an comhthéacs a mhalairt —

ciallaíonn “Acht 1946” an tAcht Forbartha Móna, 1946 ;

ciallaíonn “Acht 1953” an tAcht Forbartha Móna, 1953 ;

ciallaíonn “Acht 1963” Acht na gCuideachtaí, 1963 ;

ciallaíonn “Acht 1990” an tAcht Forbartha Móna, 1990 ;

ciallaíonn “na hAchtanna” Achtanna na gCuideachtaí, 1963 go 1990;

ciallaíonn “ceadú an Aire” réamhcheadú i scríbhinn ón Aire agus forléireofar abairtí gaolmhara dá réir sin;

ciallaíonn “an Bord” Bord na Móna;

ciallaíonn “cuideachta” cuideachta arna foirmiú agus arna clárú faoi na hAchtanna;

ciallaíonn “an Chuideachta” an chuideachta arna foirmiú agus arna clárú faoi na hAchtanna de bhun alt 7;

ciallaíonn “toiliú an Aire” réamhthoiliú an Aire i scríbhinn;

ciallaíonn “stiúrthóir” stiúrthóir den Chuideachta;

folaíonn “achtachán” ionstraim arna déanamh faoi achtachán;

folaíonn “feidhmeanna” cumhachtaí agus dualgais agus folaíonn tagairtí d'fheidhm a chomhlíonadh maidir le cumhacht nó dualgas, tagairtí don chumhacht a fheidhmiú nó don dualgas a chomhall;

ciallaíonn “an Stiúrthóir Bainistíochta” príomhoifigeach na Cuideachta a cheapfar faoi alt 26 ;

ciallaíonn “an tAire” an tAire Fiontar Poiblí;

ciallaíonn “ceardchumainn nó comhlachais foirne aitheanta” ceardchumainn nó comhlachais foirne a aithneoidh an Chuideachta nó fochuideachta chun críocha caibidlí a bhaineann le luach saothair, nó le coinníollacha fostaíochta nó coinníollacha oibre comhaltaí d'fhoireann na Cuideachta nó na fochuideachta, de réir mar a bheidh;

ciallaíonn “scaireanna” scaireanna láníoctha i scairchaipiteal na Cuideachta;

ciallaíonn “fochuideachta”, seachas i gCuid III den Acht seo, fochuideachta (de réir bhrí Acht 1963) den Chuideachta;

ciallaíonn “na fochuideachtaí” cuideachtaí arna bhfoirmiú agus arna gclárú faoi na hAchtanna de bhun alt 34 agus forléireofar “fochuideachta” i gCuid III den Acht seo dá réir sin;

ciallaíonn “lá an aistrithe”, i ndáil le gach ceann de na fochuideachtaí, an lá a cheapfar faoi alt 35 chun bheith mar lá an aistrithe i ndáil leis an bhfochuideachta sin;

ciallaíonn “an lá dílseacháin” an lá a cheapfar faoi alt 6 chun bheith ina lá dílseacháin.

(2) San Acht seo—

(a) aon tagairt d'alt is tagairt í d'alt den Acht seo mura gcuirtear in iúl gur tagairt d'fhoráil éigin eile atá beartaithe, agus

(b) aon tagairt d'fho-alt, do mhír nó d'fhomhír is tagairt í d'fho-alt, do mhír nó d'fhomhír den fhoráil ina bhfuil an tagairt mura gcuirtear in iúl gur tagairt d'fhoráil éigin eile atá beartaithe, agus

(c) déanfar aon tagairt d'aon achtachán a fhorléiriú mar thagairt don achtachán sin arna leasú, arna oiriúnú nó arna leathnú le haon achtachán nó faoi aon achtachán ina dhiaidh sin.

Foráil i ndáil le horduithe.

3. —Féadfaidh an tAire le hordú ordú faoin Acht seo (lena n-áirítear ordú faoin alt seo) a leasú nó a chúlghairm.

Aisghairm.

4. —Aisghairtear leis seo alt 25 den Acht Fuinnimh (Forálacha Ilghnéitheacha), 1995.

Caiteachais an Aire agus an Aire Airgeadais.

5. —Déanfar na caiteachais a thabhóidh an tAire ag riaradh an Achta seo a íoc, a mhéid a cheadóidh an tAire Airgeadais, as airgead a sholáthróidh an tOireachtas, agus déanfar na caiteachais a thabhóidh an tAire Airgeadais ag riaradh an Achta seo a íoc as airgead a sholáthróidh an tOireachtas.