Uimhir 7 de 2008

AN tACHT UM CHEARTAS COIRIÚIL (CÚNAMH FRITHPHÁIRTEACH) 2008

[An tiontú oifigiúil]

RIAR NA nALT

CUID 1

Réamhráiteach agus Ginearálta

Alt

1 . Gearrtheideal agus tosach feidhme.

2 . Léiriú (ginearálta).

3 . Srian ginearálta ar chúnamh a sholáthar.

4 . Stát ainmnithe.

5 . Feidhm dlí a bheith ag Airteagail áirithe de Choinbhinsiún 2000 agus den Dara Prótacal Breise.

6 . Iarrataí (ginearálta).

7 . Fianaise a tharchur chuig stát ainmnithe (ginearálta).

8 . Údarás Lárnach.

9 . Malartú spontáineach faisnéise.

10 . Aisghairm.

11 . Cosaint.

CUID 2

Faisnéis faoi Idirbhearta Airgeadais chun críocha Imscrúdaithe Choiriúil

12 . Léiriú (Cuid 2).

Faisnéis faoi idirbhearta airgeadais ar faisnéis í atá le húsáid sa Stát

13 . Ordú um fhaisnéis chuntais agus ordú um fhaireachán cuntais.

14 . Iarraidh chuig stát ainmnithe ar fhaisnéis faoi idirbhearta airgeadais.

Faisnéis faoi idirbhearta airgeadais ar faisnéis í atá le húsáid i stát ainmnithe

15 . Iarraidh ó stát ainmnithe ar fhaisnéis faoi idirbhearta airgeadais.

16 . Gníomhú tar éis iarraidh a fháil.

17 . Ordú um fhaisnéis chuntais agus ordú um fhaireachán cuntais ar scór iarrata.

18 . Faisnéis a fhaightear a tharchur chuig údarás iarrthach.

19 . Fógra faoi imscrúduithe ionchasacha breise a chur in iúl don údarás iarrthach.

Forlíontach

20 . Ordú um fhaisnéis chuntais nó ordú um fhaireachán cuntais a athrú nó a urscaoileadh.

21 . Cionta faoin gCuid seo.

CUID 3

Teachtaireachtaí Teileachumarsáide a Thascradh

Réamhráiteach

22 . Léiriú (Cuid 3).

Iarrataí ar thascradh i gcás inar gá cúnamh teicniúil

23 . Iarraidh chuig ballstát ar thascradh.

24 . Iarraidh chuig an Stát ar thascradh.

25 . Gníomhú tar éis iarraidh a fháil.

Fógraí faoi thascarthaí eile

26 . Fógra a thabhairt don bhallstát maidir le tascradh.

27 . Fógra ó bhallstát maidir le tascradh.

Ilghnéitheach

28 . Teachtaireachtaí teileachumarsáide a thascradh go neamhdhíreach.

29 . Feidhm Acht 1993 i ndáil leis an gCuid seo.

30 . Leasú ar alt 110 d’Acht 1983.

CUID 4

Maoin a Chalcadh, a Choigistiú agus a Fhorghéilleadh

Caibidil 1

Léiriú

31 . Léiriú (Cuid 4).

Caibidil 2

Maoin a chalcadh

32 . Ordú calctha i ndáil le fianaise.

33 . Ordú calctha a tharchur lena fhorfheidhmiú lasmuigh den Stát.

34 . Orduithe calctha seachtracha a tharchur chuig an Stát lena bhforfheidhmiú.

35 . Orduithe calctha seachtracha a aithint agus a fhorfheidhmiú.

36 . Feidhm, etc., orduithe um chomhar i dtaca le calcadh.

37 . Clárú orduithe um chomhar i dtaca le calcadh.

38 . An Ard-Chúirt nó glacadóir d’fheidhmiú cumhachtaí faoin gCaibidil seo.

39 . Glacadóirí: forálacha forlíontacha.

40 . Féimheacht cosantóra, etc.

41 . An Sannaí Oifigiúil do dhéileáil le maoin atá ina hábhar d’ordú um chomhar i dtaca le calcadh.

42 . Fáltais ó réadú a úsáid.

43 . Cuideachta a shealbhaíonn maoin inréadaithe a fhoirceannadh.

44 . Ré ordaithe um chomhar i dtaca le calcadh.

45 . Ordú um chomhar i dtaca le calcadh a athrú nó a urscaoileadh.

46 . Diúltú ordú um chomhar i dtaca le calcadh a dhéanamh.

47 . Ordú um chomhar i dtaca le calcadh a iarchur.

48 . Mar a dhéileálfar le maoin chalctha ina dhiaidh sin.

Caibidil 3

Maoin a Choigistiú

49 . Iarraidh ar mhaoin i stát ainmnithe a choigistiú.

50 . Ordú coigistíochta seachtrach a tharchur chuig an Stát.

51 . Ordú um chomhar coigistíochta.

52 . Orduithe um chomhar coigistíochta a fhorfheidhmiú, etc.

53 . Réadú maoine atá ina hábhar d’ordú um chomhar coigistíochta.

54 . Ús ar shuimeanna gan íoc faoi orduithe um chomhar coigistíochta.

55 . Íocaíochtaí faoi orduithe um chomhar coigistíochta a bheith le sloinneadh san euro.

56 . An Ard-Chúirt nó glacadóir d’fheidhmiú cumhachtaí faoin gCaibidil seo.

57 . Feidhm forálacha áirithe a bhaineann le horduithe um chomhar i dtaca le calcadh maidir le horduithe um chomhar coigistíochta.

Caibidil 4

Maoin a Fhorghéilleadh

58 . Ordú forghéillte seachtrach a tharchur chuig stát ainmnithe lena fhorfheidhmiú.

59 . Ordú forghéillte seachtrach a tharchur chuig an Stát lena fhorfheidhmiú.

60 . Ordú um chomhar i dtaca le forghéilleadh.

CUID 5

Fianaise a Sholáthar

Caibidil 1

Léiriú

61 . Léiriú (Cuid 5).

Caibidil 2

Fianaise a Ghlacadh

62 . Fianaise ó dhuine i stát ainmnithe.

63 . Fianaise atá le húsáid i stát ainmnithe.

64 . Pribhléid finnéithe.

Fianaise ó phríosúnaigh

65 . Príosúnach a aistriú chun fianaise a thabhairt nó chun cúnamh a thabhairt maidir le himscrúdú coiriúil sa Stát.

66 . Príosúnach a aistriú chun fianaise nó cúnamh a thabhairt in imscrúdú lasmuigh den Stát.

Fianaise trí nasc teilifíse

67 . Fianaise trí nasc teilifíse lena húsáid sa Stát.

68 . Iarraidh ar fhianaise trí nasc teilifíse lena húsáid lasmuigh den Stát.

69 . Gníomhú tar éis iarraidh a fháil.

70 . An fhianaise a ghlacadh.

Fianaise trí nasc teileafóin lena húsáid lasmuigh den Stát

71 . Iarraidh ar fhianaise trí nasc teileafóin.

72 . Fianaise a ghlacadh.

Fianaise a chuardach

73 . Fianaise a chuardach in áit i stát ainmnithe.

74 . Fianaise a chuardach lena húsáid lasmuigh den Stát (ginearálta).

75 . Fianaise áirithe a chuardach lena húsáid lasmuigh den Stát.

Caibidil 3

Fianaise maidir le céannú

76 . Mínithe (Caibidil 3).

77 . Fianaise maidir le céannú lena húsáid sa Stát.

78 . Fianaise maidir le céannacht lena húsáid lasmuigh den Stát.

79 . Gníomhú tar éis iarraidh a fháil.

CUID 6

Foirmeacha Eile Cúnaimh

Caibidil 1

Doiciméid a sheirbheáil

80 . Doiciméid atá le seirbheáil lasmuigh den Stát.

81 . An modh seirbheála.

82 . Doiciméid a sheirbheáil sa Stát.

Caibidil 2

Rudaí agus láithreáin a scrúdú

83 . Rudaí agus láithreáin a scrúdú.

Caibidil 3

Aiseag

84 . Aiseag maoine a goideadh ó stát ainmnithe.

85 . Iarraidh chuig an Stát ar aiseag maoine goidte.

86 . Gníomhú tar éis iarraidh a fháil.

87 . Ordú maidir le haiseag.

Caibidil 4

Seachadadh rialaithe

88 . Léiriú (Caibidil 4).

89 . Seachadadh rialaithe i stát ainmnithe.

90 . Seachadadh rialaithe sa Stát.

91 . Leasú ar Acht an Gharda Síochána 2005.

92 . Feidhm an Achta um Cheartas Coiriúil (Foirne Comhpháirteacha um Imscrúdú) 2004 i ndáil le seachadadh rialaithe.

CUID 7

Cúnamh Frithpháirteach in Ábhair Choiriúla idir an Stát agus Stáit Aontaithe Mheiriceá

93 . Mínithe (Cuid 7).

94 . Feidhm Chonradh na hÉireann-Stáit Aontaithe Mheiriceá sa Stát.

CUID 8

Ilghnéitheach

95 . Faisnéis a bhaineann le cionta sceimhlitheoireachta a mhalartú idir Europol, Eurojust agus ballstáit.

96 . Feidhm an Achta um Cheartas Coiriúil (Foirne Comhpháirteacha um Imscrúdú) 2004 agus leasú air.

97 . Ionadaithe stáit iarrthaigh a bheith i láthair le linn iarraidh a fhorghníomhú.

98 . Comhaltaí den Gharda Síochána a bheith i láthair le linn iarraidh a fhorghníomhú i stát ainmnithe.

99 . Úsáid faisnéise nó fianaise a fhaightear mar fhreagra ar iarraidh i stát ainmnithe.

100 . Nochtadh do dhéanamh dochair d'imscrúdú.

101 . Dliteanas oifigeach de chuid comhlachta chorpraithe.

102 . Fianaise in imeachtaí (ginearálta).

103 . Bearta sealadacha.

104 . Aitheantas a thabhairt do chearta tríú páirtithe.

105 . Leasú ar an Acht um Cheartas Coiriúil 1994.

106 . Leasú ar alt 8(7) den Acht fán mBiúró um Shócmhainní Coiriúla 1996.

107 . Sonraí pearsanta a chosaint.

108 . Breitheamh den Chúirt Dúiche d’fheidhmiú cumhachtaí lasmuigh de dhúiche chúirte dúiche.

109 . Rialacháin.

110 . Caiteachais.

111 . Orduithe nó rialacháin a leagan faoi bhráid Thithe an Oireachtais.

SCEIDEAL 1

Téacs Choinbhinsiún 2000

SCEIDEAL 2

Téacs Phrótacal 2001

SCEIDEAL 3

Téacs an Chomhaontaithe leis an Íoslainn agus leis an Iorua

SCEIDEAL 4

Téacs Airteagail 49 agus 51 de Choinbhinsiún Schengen

SCEIDEAL 5

Téacs an Chreat-Chinnidh

SCEIDEAL 6

Téacs Theideal III de Chomhaontú CE/Chónaidhm na hEilvéise

SCEIDEAL 7

Téacs Chinneadh 2005 ón gComhairle

SCEIDEAL 8

CUID 1

Téacs Choinbhinsiún 1959

CUID 2

Téacs an Chéad Phrótacail Bhreise a ghabhann le Coinbhinsiún 1959

SCEIDEAL 9

Téacs an Dara Prótacal Breise a ghabhann le Coinbhinsiún 1959

SCEIDEAL 10

Téacs Chaibidil IV de Choinbhinsiún 2005

SCEIDEAL 11

Téacs Airteagail 13, 14, 18, 19 agus 20 de Choinbhinsiún na Náisiún Aontaithe i gcoinne Coireachta Eagraithe Trasnáisiúnta, arna dhéanamh i Nua-Eabhrac an 15 Samhain 2000.

SCEIDEAL 12

Téacs Airteagail 46, 49, 50 agus 54 go 57 de Choinbhinsiún na Náisiún Aontaithe i gcoinne Éillithe, arna dhéanamh i Nua-Eabhrac an 31 Deireadh Fómhair 2003

SCEIDEAL 13

Téacs Chomhaontú an Aontais Eorpaigh/Stáit Aontaithe Mheiriceá maidir le Cúnamh Dlíthiúil Frithpháirteach

SCEIDEAL 14

Téacs Chonradh na hÉireann/Stáit Aontaithe Mheiriceá dar dáta an 18 Eanáir 2001, arna chur i bhfeidhm le hIonstraim an 14 Iúil 2005

Na hAchtanna dá dTagraítear

Uimhir 7 de 2008

ACHT—

(a) DÁ CHUMASÚ ÉIFEACHT A THABHAIRT SA STÁT DO CHOMHAONTUITHE IDIRNÁISIÚNTA ÁIRITHE NÓ D’FHORÁLACHA DE CHUID NA gCOMHAONTUITHE SIN, IDIR AN STÁT AGUS STÁIT EILE A BHAINEANN LE CÚNAMH FRITHPHÁIRTEACH IN ÁBHAIR CHOIRIÚLA;

(b)DO DHÉANAMH AISGHAIRM AGUS ATHACHTÚ, MAILLE LE LEASUITHE, AR CHUID VII (COMHAR IDIRNÁISIÚNTA) DEN ACHT UM CHEARTAS COIRIÚIL 1994;

AGUS DO DHÉANAMH SOCRÚ I dTAOBH NITHE GAOLMHARA.

[28 Aibreán, 2008]

ACHTAÍTEAR AG AN OIREACHTAS MAR A LEANAS:

CUID 1

Réamhráiteach agus Ginearálta

1 .— (1) Féadfar an tAcht um Cheartas Coiriúil (Cúnamh Frithpháirteach) 2008 a ghairm den Acht seo.

(2) Tiocfaidh an tAcht seo i ngníomh cibé lá nó laethanta a cheapfar le hordú nó le horduithe ón Aire, i gcoitinne nó faoi threoir críche nó forála áirithe, agus féadfar laethanta éagsúla a cheapadh amhlaidh chun críoch éagsúil agus le haghaidh forálacha éagsúla.

2 .— (1) San Acht seo, ach amháin mar a n-éilíonn an comhthéacs a mhalairt—

ciallaíonn “ Acht 1994 ” an tAcht um Cheartas Coiriúil 1994;

ciallaíonn “ Comhaontú leis an Íoslainn agus leis an Iorua ” an Comhaontú idir an tAontas Eorpach agus Poblacht na hÍoslainne agus Ríocht na hIorua ar fheidhm forálacha áirithe de Choinbhinsiún 2000 agus de Phrótacal 2001, a rinneadh sa Bhruiséil an 19 Nollaig 2003;

ciallaíonn “ Airteagail 49 agus 51 ”, i ndáil le Coinbhinsiún Schengen, na hAirteagail sin den Choinbhinsiún, arna gcur chun feidhme maidir leis an Stát le Cinneadh (2002/192/CEE) ¹ an 28 Feabhra 2002 ón gComhairle maidir le hiarraidh na hÉireann a bheith páirteach i roinnt forálacha de chuid acquis Schengen, ach ní fholaíonn sé mír (a) (arna haisghairm le hAirteagal 2.2 de Choinbhinsiún 2000) d’Airteagal 49;

folaíonn “ údarás ” duine;

ciallaíonn “ Coinbhinsiún 1959 ” an Coinbhinsiún Eorpach um Chúnamh Frithpháirteach i ndáil le hÁbhair Choiriúla, arna dhéanamh in Strasbourg an 20 Aibreán 1959, agus folaíonn sé Prótacal Breise an 17 Márta 1978 a ghabhann leis;

ciallaíonn “ Coinbhinsiún 2000 ” an Coinbhinsiún um Chúnamh Frithpháirteach i ndáil le hÁbhair Choiriúla idir Ballstáit an Aontais Eorpaigh ² , arna dhéanamh sa Bhruiséil an 29 Bealtaine 2000;

ciallaíonn “ Coinbhinsiún 2005 ” Coinbhinsiún Chomhairle na hEorpa um Sciúradh, Cuardach, Urghabháil agus Coigistiú na bhFáltas ó Choireacht agus um Maoiniú Sceimhlitheoireachta, arna dhéanamh i Vársá an 16 Bealtaine 2005;

ciallaíonn “ Cinneadh 2005 ón gComhairle ” Cinneadh 2005/671/JHA ³ an 20 Meán Fómhair 2005 ón gComhairle maidir le malartú faisnéise agus comhar i dtaca le cionta sceimhlitheoireachta;

ciallaíonn “ Coinbhinsiún Sceimhlitheoireachta 1977 ” an Coinbhinsiún Eorpach chun Sceimhliú a Dhíchur, arna dhéanamh in Strasbourg an 27 Eanáir 1977;

ciallaíonn “ Údarás Lárnach ” an t-údarás a luaitear in alt 8 ;

ciallaíonn “ iompar coiriúil ” aon iompar—

(a) ar cion é, nó

(b) a tharlaíonn i stát ainmnithe agus ar chion é dá mba sa Stát a tharlódh sé;

maidir le “ imscrúdú coiriúil ”—

(a) ciallaíonn sé imscrúdú i dtaobh an ndearna duine cion (de réir bhrí na Coda iomchuí) faoi dhlí an Stáit nó faoi dhlí stáit ainmnithe ar ina leith, más cuí, a fhéadfar iarraidh ar chúnamh a dhéanamh faoin ionstraim idirnáisiúnta iomchuí; agus

(b) folaíonn sé imscrúdú i dtaobh ar thairbhigh duine ó shócmhainní nó ó fháltais a dhíorthaíonn as iompar coiriúil nó an bhfuil sócmhainní nó fáltais den sórt sin á bhfáil nó faoina rialú ag duine;

ciallaíonn “ imeachtaí coiriúla ” imeachtaí, cibé acu sa Stát nó i stát ainmnithe, ar imeachtaí iad i gcoinne duine i leith ciona agus folaíonn sé—

(a) imeachtaí chun a chinneadh an bhfuair duine tairbhe as sócmhainní nó as fáltais a éiríonn as iompar coiriúil nó an bhfaigheann nó an rialaíonn duine sócmhainní nó fáltais den sórt sin,

(b) imeachtaí maidir le bearta a bhaineann leis na nithe seo a leanas—

(i) seachadadh a iarchur nó forfheidhmiú pianbhreithe nó birt choiscthigh a fhionraí,

(ii) scaoileadh saor coinníollach, nó

(iii) bac nó bearnú ar fhorfheidhmiú pianbhreithe nó birt choiscthigh,

(c) i ndáil le hiarrataí ar chúnamh ó údarás iarrthach i mballstát—

(i) gan dochar d’fho-alt (2)(b) d’ailt 74 agus 75 (iarrataí ar fhianaise nó ábhar fianaiseach), imeachtaí arna dtionscnamh ag údarás riaracháin i leith iompair atá inphionóis faoi dhlí an Stáit nó faoi dhlí an stáit sin nó faoi dhlí an dá stát, de bhua gur sáruithe iad ar na rialacha dlí, agus i gcás ina bhféadfadh an cinneadh a bheith ina chúis le himeachtaí os comhair cúirte ag a bhfuil dlínse in ábhair choiriúla go háirithe,

(ii) imeachtaí in éilimh ar dhamáistí a éiríonn as ionchúiseamh nó ciontú éagórach,

(iii) imeachtaí trócaire,

(iv) caingne sibhialta a bheidh uamtha le himeachtaí coiriúla, a mhéid nach mbeidh cinneadh críochnaitheach déanta sna himeachtaí coiriúla ag an gcúirt choiriúil lena mbaineann, agus

(v) imeachtaí i leith beart a bhaineann leis na nithe seo a leanas—

(I) seachadadh a iarchur nó forfheidhmiú pianbhreithe nó birt choiscthigh a fhionraí,

(II) scaoileadh saor coinníollach, nó

(III) bac nó bearnú ar fhorfheidhmiú pianbhreithe nó birt choiscthigh,

agus

(d) i ndáil le hiarrataí ar chúnamh ó údarás iarrthach i stát ainmnithe (seachas ballstát), gan dochar d’fho-alt (3) d’ailt 74 agus 75, imeachtaí arna dtionscnamh ag údarás riaracháin i leith iompair atá inphionóis faoi dhlí an Stáit nó faoi dhlí an stáit sin nó faoi dhlí an dá stát, de bhua gur sáruithe iad ar na rialacha dlí, agus i gcás ina bhféadfadh an cinneadh a bheith ina chúis le himeachtaí os comhair cúirte ag a bhfuil dlínse in ábhair choiriúla go háirithe;

ciallaíonn “stát ainmnithe” ballstát agus aon stát eile arna ainmniú faoi alt 4 ;

ciallaíonn “ Comhaontú CE/Chónaidhm na hEilvéise ” an Comhaontú um Chomhar idir an Comhphobal Eorpach agus a bhallstáit, de pháirt, agus Cónaidhm na hEilvéise, den pháirt eile, chun calaois agus aon ghníomhaíocht neamhdhleathach eile a dhéanann dochar dá leasanna airgeadais a chomhrac, arna dhéanamh i Lucsamburg an 26 Deireadh Fómhair 2004;

ciallaíonn “fianaise” fianaise ó bhéal nó, de réir mar is cuí, aon doiciméad nó rud a d’fhéadfaí a thabhairt ar aird mar fhianaise in imeachtaí coiriúla, lena n-áirítear aon fhaisnéis i bhfoirm neamh-inléite a d’fhéadfaí a aistriú go foirm bhuan agus inléite chun críocha na n-imeachtaí sin;

ciallaíonn “Creat-Chinneadh” Creat-Chinneadh (2003/577/JHA ⁴ ) an 22 Iúil 2003 ón gComhairle maidir le horduithe lena gcalctar maoin nó fianaise a fhorghníomhú san Aontas Eorpach;

folaíonn “príosúnacht” coinneáil agus, i ndáil le stát ainmnithe, cailleadh saoirse d’aon chineál eile;

ciallaíonn “ ionstraim idirnáisiúnta ” aon cheann de na comhaontuithe seo a leanas, nó forálacha na gcomhaontuithe sin, idir an Stát agus stáit eile nó stát eile i ndáil le cúnamh frithpháirteach in ábhair choiriúla:

(a) Coinbhinsiún 2000;

(b) Prótacal 2001;

(c) an Comhaontú leis an Íoslainn agus leis an Iorua;

(d) Airteagail 49 agus 51 de Choinbhinsiún Schengen;

(e) an Creat-Chinneadh;

(f) Teideal III de Chomhaontú CE/Chónaidhm na hEilvéise;

(g) Cinneadh 2005 ón gComhairle;

(h) Coinbhinsiún 1959;

(i) an Dara Prótacal Breise;

(j) Caibidil IV de Choinbhinsiún 2005;

(k) Airteagail 13, 14, 18, 19 agus 20 de Choinbhinsiún na Náisiún Aontaithe i gcoinne Coireachta Eagraithe Trasnáisiúnta, arna dhéanamh i Nua-Eabhrac an 15 Samhain 2000;

(l) Airteagail 46, 49, 50 agus 54 go 57 de Choinbhinsiún na Náisiún Aontaithe i gcoinne Éillithe, arna dhéanamh i Nua-Eabhrac an 31 Deireadh Fómhair 2003;

(m) comhaontú déthaobhach idir an Stát agus stát ainmnithe maidir le cúnamh den sórt sin a sholáthar; agus

(n) aon fhorchoimeádas nó dearbhú arna dhéanamh de réir ionstraime den sórt sin;

ciallaíonn “ballstát”—

(a) ballstát den Aontas Eorpach (seachas an Stát), chun críocha cúnaimh fhrithpháirtigh faoi fhorálacha Choinbhinsiún 2000, Phrótacal 2001, Airteagail 49 agus 51 de Choinbhinsiún Schengen, an Chreat-Chinnidh nó Chinneadh 2005, agus

(b) an Íoslainn agus an Iorua nó aon stát ainmnithe eile, chun críocha cúnaimh fhrithpháirtigh faoi aon cheann de na forálacha sin;

ciallaíonn “Aire” an tAire Dlí agus Cirt, Comhionannais agus Athchóirithe Dlí;

maidir le “cion”—

(a) ciallaíonn sé cion ar ina leith a fhéadfar iarraidh a dhéanamh ar chúnamh frithpháirteach faoin ionstraim idirnáisiúnta iomchuí,

(b) folaíonn sé cion ioncaim, más rud é, nó sa mhéid, maidir leis an ionstraim idirnáisiúnta iomchuí nó maidir le dlí an stáit ainmnithe lena mbaineann, go ndéantar foráil leis an ionstraim nó leis an dlí sin maidir le cúnamh frithpháirteach i leith ciona den sórt sin, ach

(c) ní fholaíonn sé cion polaitiúil;

ciallaíonn “ áit ” suíomh fisiciúil agus folaíonn sé—

(a) teaghais, teach cónaithe, foirgneamh nó áit chónaithe,

(b) láithreán,

(c) feithicil, cibé acu feithicil inneallghluaiste nó nach ea,

(d) soitheach, cibé acu soitheach farraige nó nach ea,

(e) aerárthach, cibé acu inoibrithe nó nach ea, agus

(f) sciorrárthach;

maidir le “cion polaitiúil”, ach amháin i gCuid 2—

(a) folaíonn sé cion atá bainteach le cion polaitiúil,

(b) ní fholaíonn sé aon chion ar ina leith a fhéadfar duine a thabhairt suas do stát eile faoin Acht um Barántas Gabhála Eorpach 2003 nó faoi na hAchtanna um Eiseachadadh 1965 go 2001;

ciallaíonn “príosún” áit coimeádta (seachas stáisiún Garda Síochána) arna riaradh ag an Aire nó a riartar thar ceann an Aire, agus folaíonn sé—

(a) Foras Naomh Pádraig,

(b) áit arna soláthar faoi alt 2 d’Acht na bPríosún 1970,

(c) áit arna sonrú faoi alt 3 d’Acht na bPríosún 1972;

ach amháin i gCuid 4, folaíonn “maoin”—

(a) airgead agus gach maoin eile, réadach nó pearsanta, sochorraithe nó dochorraithe,

(b) ábhar i gcaingean agus aon mhaoin dho-láimhsithe nó neamhchorprach eile,

(c) fáltais as maoin a dhiúscairt, agus

(d) fianaise;

ciallaíonn “Prótacal 2001” an Prótacal ⁵ a ghabhann le Coinbhinsiún 2000, arna dhéanamh i Lucsamburg an 16 Deireadh Fómhair 2001;

ciallaíonn “ionstraim idirnáisiúnta iomchuí” an ionstraim idirnáisiúnta ar dá réir a dhéantar iarraidh ar chúnamh;

ciallaíonn “iarraidh” iarraidh ar chúnamh ar iarraidh í a dhéanann údarás iarrthach faoi réim agus de réir ionstraime idirnáisiúnta iomchuí;

ciallaíonn “údarás iarrthach”—

(a) cúirt nó binse agus í nó é ag feidhmiú dlínse in imeachtaí coiriúla i stát ainmnithe agus ag déanamh iarrata, nó

(b) aon údarás eile sa stát sin ar dóigh leis an Aire ina leith gurb é a fheidhm an iarraidh a dhéanamh;

maidir le “cion ioncaim”—

(a) ciallaíonn sé cion faoi dhlí an Stáit nó faoi dhlí stáit ainmnithe i dtaca le cánacha, dleachtanna, custaim nó rialáil malairte,

(b) folaíonn sé cion den sórt sin faoi dhlí stáit ainmnithe is cuma an ndéantar foráil le dlí an Stáit maidir le cánacha, dleachtanna, custaim nó rialáil malairte den chineál céanna a ndéantar foráil ina leith sa stát sin, ach

(c) ní fholaíonn sé—

(i) cion ina ndéantar forneart a úsáid nó a bhagairt nó ina ndéantar mionnú éithigh nó brionnú doiciméid arna eisiúint faoi údarás reachtúil, nó

(ii) cion a líomhnaítear ina leith gur oifigeach Ioncaim de chuid an stáit sin a rinne é ina cháil nó ina cáil mar oifigeach den sórt sin;

ciallaíonn “Coinbhinsiún Schengen” an Coinbhinsiún a síníodh in Schengen an 19 Meitheamh 1990 agus lena ndéantar Comhaontú Schengen an 14 Meitheamh 1985 a chur i ngníomh;

ciallaíonn “ Dara Prótacal Breise ” Dara Prótacal Breise an 8 Samhain 2001 a ghabhann le Coinbhinsiún 1959;

folaíonn “stát”, i ndáil le stát seachas an Stát, críoch, cibé acu sa stát nó lasmuigh de, ar críoch í—

(a) a bhfuil an stát nó rialtas an stáit freagrach go hiomlán nó go páirteach as a caidreamh eachtrach, agus

(b) a bhfuil feidhm ag an ionstraim idirnáisiúnta iomchuí maidir leis nó a ndéantar foráil lena dlí maidir le cúnamh frithpháirteach in ábhair choiriúla,

agus tá “stát ainmnithe” agus “ballstát” le forléiriú dá réir sin.

(2) Níl feidhm ag forchoimeádais arna ndéanamh de bhun Airteagal 13 de Choinbhinsiún Sceimhlitheoireachta 1977 maidir le cúnamh frithpháirteach idir ballstáit.

(3) Tugtar éifeacht leis na forálacha seo a leanas den Acht seo do Chinneadh (2002/192/CE) an 28 Feabhra 2002 ón gComhairle maidir le hiarraidh na hÉireann a bheith páirteach i roinnt forálacha de chuid acquis Schengen, a mhéid a bhaineann na forálacha sin le cúnamh frithpháirteach in ábhair choiriúla:

(a) mír (c) den mhíniú ar “imeachtaí coiriúla” i bhfo-alt (1);

(b) fo-ailt (1) agus (2) d'ailt 74 agus 75;

(c) alt 82 (1)(b).

(4) Tabharfar aird bhreithiúnach ar ionstraim idirnáisiúnta iomchuí.

(5) Le linn aon fhoráil den Acht seo a léiriú—

(a) féadfaidh cúirt breithniú a dhéanamh ar an ionstraim idirnáisiúnta iomchuí agus ar aon doiciméad míniúcháin a eisítear ina teannta, agus

(b) cibé creidiúnacht is cuí sna himthosca a thabhairt don ionstraim agus d’aon doiciméad den sórt sin.

(6) Mar áis tagartha—

(a) tá an téacs Béarla de Choinbhinsiún 2000 leagtha amach i Sceideal 1,

(b) tá an téacs Béarla de Phrótacal 2001 leagtha amach i Sceideal 2,

(c) tá an téacs Béarla den Chomhaontú leis an Íoslainn agus leis an Iorua leagtha amach i Sceideal 3,

(d) tá an téacs Béarla d’Airteagail 49 agus 51 de Choinbhinsiún Schengen leagtha amach i Sceideal 4,

(e) tá an téacs Béarla den Chreat-Chinneadh leagtha amach i Sceideal 5,

(f) tá an téacs Béarla de Theideal III de Chomhaontú CE/Chónaidhm na hEilvéise leagtha amach i Sceideal 6,

(g) tá an téacs Béarla de Chinneadh 2005 ón gComhairle leagtha amach i Sceideal 7,

(h) tá an téacs Béarla de Choinbhinsiún 1959 agus den Chéad Phrótacal Breise a ghabhann leis leagtha amach i Sceideal 8,

(i) tá an téacs Béarla den Dara Prótacal Breise a ghabhann le Coinbhinsiún 1959 leagtha amach i Sceideal 9,

(j) tá an téacs Béarla de Chaibidil IV de Choinbhinsiún 2005 leagtha amach i Sceideal 10,

(k) tá an téacs Béarla d’Airteagail 13, 14, 18, 19 agus 20 de Choinbhinsiún na Náisiún Aontaithe i gcoinne Coireachta Eagraithe Trasnáisiúnta, arna dhéanamh i Nua-Eabhrac an 15 Samhain 2000, leagtha amach i Sceideal 11,

(l) tá an téacs Béarla d’Airteagail 46, 49, 50 agus 54 go 57 de Choinbhinsiún na Náisiún Aontaithe i gcoinne Éillithe, arna dhéanamh i Nua-Eabhrac an 31 Deireadh Fómhair 2003, leagtha amach i Sceideal 12,

(m) tá an téacs Béarla den Chomhaontú maidir le Cúnamh Dlíthiúil Frithpháirteach idir an tAontas Eorpach agus Stáit Aontaithe Mheiriceá, arna dhéanamh in Washington D.C. an 25 Meitheamh 2003, leagtha amach i Sceideal 13, agus

(n) tá an téacs Béarla den Chonradh idir Rialtas na hÉireann agus Rialtas na Stát Aontaithe maidir le Cúnamh Frithpháirteach in Ábhair Choiriúla, arna dhéanamh in Washington D.C. an 18 Eanáir 2001, arna chur i bhfeidhm leis an Ionstraim atá beartaithe le hAirteagal 3(2) den Chomhaontú sin dar dáta an 25 Meitheamh 2003 agus arna dhéanamh i mBaile Átha Cliath an 14 Iúil 2005, leagtha amach i Sceideal 14.

3 .— (1) Diúltófar cúnamh a thabhairt—

(a) má mheasann an tAire gur dóigh go ndéanfaí dochar do fhlaitheas, do shlándáil nó do leasanna riachtanacha eile an Stáit dá dtabharfaí cúnamh nó go mbeadh sé contrártha do bheartas poiblí (ordre public),

(b) má tá forais réasúnacha ann chun a chreidiúint—

(i) go ndearnadh an iarraidh lena mbaineann chun duine a ionchúiseamh nó a phionósú mar gheall ar a ghnéas nó a gnéas, a chine nó a cine, a chreideamh nó a creideamh, a bhunadh eitneach nó a bunadh eitneach, a náisiúntacht, a theanga nó a teanga, a thuairimí polaitíochta nó a tuairimí polaitíochta, nó a ghnéaschlaonadh nó a gnéaschlaonadh,

(ii) go bhféadfadh sé tarlú, dá soláthrófaí cúnamh—

(I) go ndéanfaí dochar do sheasamh duine maidir le haon cheann de na cúiseanna sin,

(II) gurbh é ba thoradh leis ná go ndéanfaí céastóireacht ar an duine nó go ndéanfaí sárú eile ar an gCoinbhinsiún Eorpach um Chearta an Duine i leith an duine,

(c) más rud é nach bhfuil an iarraidh de réir na hionstraime idirnáisiúnta iomchuí, nó

(d) más rud go ndéanfaí dochar d’imscrúdú coiriúil, nó d’imeachtaí coiriúla, sa Stát dá soláthrófaí cúnamh agus fad a dhéanfaí dochar amhlaidh,

agus féadfar é a dhiúltú ar aon fhoras eile chun cúnamh a dhiúltú ar foras é a shonraítear san ionstraim idirnáisiúnta iomchuí.

(2) San alt seo, tá le “ céastóireacht ” an bhrí a thugtar dó leis an Acht um Cheartas Coiriúil (Coinbhinsiún na Náisiún Aontaithe in aghaidh Céastóireachta) 2000.

4 .— Féadfaidh an tAire Gnóthaí Eachtracha le hordú, tar éis dul i gcomhairle leis an Aire, stát (seachas ballstát) a ainmniú chun críocha cúnaimh fhrithpháirtigh idir an Stát agus an stát sin faoin Acht seo nó chun críocha Codanna nó forálacha sonraithe den Acht seo de réir na hionstraime idirnáisiúnta iomchuí.

5 .— (1) Faoi réir fhorálacha an Achta seo, tá feidhm an dlí ag Airteagail 4 (foirmiúlachtaí agus nósanna imeachta le linn iarrataí a fhorghníomhú) agus 6 (iarrataí a tharchur) de Choinbhinsiún 2000 agus ag Airteagail 4 (bealaí cumarsáide) agus 8 (nós imeachta) den Dara Prótacal Breise i leith a bhfeidhme maidir leis an Stát.

(2) Chun críocha fho-alt (1)—

(a) déanfar tagairtí sna hAirteagail atá luaite san fho-alt sin do stát iarrtha nó do pháirtí iarrtha nó d'údaráis, d’údaráis bhreithiúnacha nó d’údaráis inniúla an stáit nó an pháirtí sin a fhorléiriú mar thagairtí, de réir mar is cuí, don Údarás Lárnach nó don bhreitheamh nó don chúirt lena mbaineann, agus

(b) aon tagairtí do na hAirteagail sin is tagairtí iad do na hAirteagail arna modhnú le haon fhorchoimeádas nó dearbhú arna dhéanamh i ndáil leo.

6 .— (1) Faoi réir na bhforálacha den Acht seo a bhaineann le hiarrataí áirithe, tá éifeacht leis an ionstraim idirnáisiúnta iomchuí sa Stát i ndáil leis na nithe seo a leanas—

(a) foirm na n-iarrataí agus an fhaisnéis atá le soláthar leo,

(b) an gníomh a fhéadfar a dhéanamh i gcás nach gcomhlíonann iarraidh forálacha na hionstraime nó i gcás nach leor an fhaisnéis a sholáthraítear chun gur féidir déileáil leis an iarraidh,

(c) aon srianta san ionstraim maidir le diúltú d’iarrataí áirithe,

(d) aon cheanglais san ionstraim maidir le cosaint, nochtadh, úsáid nó tarchur faisnéise nó fianaise a fhaightear fúithi,

(e) na foirmiúlachtaí agus na nósanna imeachta le linn déileáil le hiarrataí, mura rud é go bhfuil na foirmiúlachtaí agus na nósanna imeachta sin contrártha do phrionsabail bhunúsacha dhlí an Stáit, agus

(f) tarchur, agus modh tarchurtha, iarrataí lena n-áirítear, i gcás ina bhforáiltear amhlaidh san ionstraim, tarchur trí Eagraíocht Idirnáisiúnta na bPóilíní Coireachta (Interpol) i gcásanna práinneacha.

(2) Ní bhaineann an tAcht seo ach amháin le hiarrataí a dhéantar tar éis an ionstraim idirnáisiúnta iomchuí a bheith tagtha i bhfeidhm, nó, de réir mar a bheidh, tar éis í a bheith curtha i bhfeidhm idir an Stát agus an stát ainmnithe lena mbaineann.

(3) Maidir le hiarrataí a fhaightear agus nach bhforghníomhaítear roimh an dáta nár mhór déileáil leo faoin Acht seo, déileálfar leo, nó leanfar de bheith ag déileáil leo, amhail is dá mba rud é nár ritheadh an tAcht seo.

(4) Maidir le hiarrataí—

(a) déanfar iad a dhíriú chuig an Údarás Lárnach, mura rud é go bhforáiltear a mhalairt leis an ionstraim idirnáisiúnta iomchuí,

(b) más cuí, léireofar iontu an ionstraim idirnáisiúnta iomchuí ar fúithi atá an iarraidh á déanamh, agus

(c) beidh siad i scríbhinn nó in aon fhoirm ónar féidir taifead scríofa a tháirgeadh faoi dhálaí trína lamháiltear a bhfíre a shuíomh.

(5) Maidir le hiarrataí chuig stát ainmnithe agus maidir le haon doiciméid tacaíochta nó doiciméid ghaolmhara, beidh aistriúchán ag gabháil leo, más cuí, ar aistriúchán é ar na hiarrataí agus ar aon doiciméid den sórt sin, nó ar na codanna ábhartha díobh, go teanga oifigiúil nó go ceann de theangacha oifigiúla an stáit sin, mura rud é gurb eol nach bhfuil aistriúchán den sórt sin ag teastáil ón údarás iomchuí sa stát ainmnithe lena mbaineann.

(6) Maidir le hiarrataí ó stát ainmnithe agus maidir le haon doiciméid tacaíochta nó doiciméid ghaolmhara, mura bhfuil siad i mBéarla nó i nGaeilge, beidh aistriúchán ar na hiarrataí agus ar aon doiciméid den sórt sin nó ar na codanna ábhartha díobh ag gabháil leo.

(7) Féadfaidh an tÚdarás Lárnach—

(a) glacadh le hiarrataí agus le haon doiciméid tacaíochta nó doiciméid ghaolmhara mar fhianaise ar na nithe a luaitear iontu, mura rud é go bhfuil faisnéis dá mhalairt aige, agus

(b) cibé faisnéis bhreise is gá chun gur féidir cinneadh a dhéanamh faoi iarraidh a lorg ón údarás iarrthach lena mbaineann.

(8) Féadfaidh an tAire gníomh maidir le hiarraidh a iarchur dá mba rud é go ndéanfadh an gníomh dochar d’imeachtaí coiriúla nó d’imscrúdú coiriúil.

(9) Sula ndiúltóidh an tAire d’iarraidh nó sula n-iarchuirfidh sé nó sí gníomh maidir leis, déanfaidh sé nó sí, i gcás inar cuí sin agus tar éis dul i gcomhairle leis an údarás iarrthach, breithniú i dtaobh an bhféadfar géilleadh don iarraidh go páirteach nó faoi réir cibé coinníollacha a mheasfaidh sé nó sí is gá.

(10) Tabharfar cúiseanna le haon diúltú nó iarchur den sórt sin.

(11) Déanfaidh an tAire aon imthosca a fhágann go bhfuil sé dodhéanta an iarraidh a chomhlíonadh nó ar dóigh dóibh comhlíonadh a mhoilliú go suntasach a chur in iúl d’údarás iarrthach.

7 .— (1) Déanfar fianaise a fhaightear sa Stát i gcomhlíonadh iarrtha a tharchur chuig an stát ainmnithe lena mbaineann de réir ordacháin an Aire.

(2) Más rud é go bhfuil deimhniú, mionnscríbhinn nó doiciméad fíoraithe eile le bheith ag gabháil le haon fhianaise den sórt sin, déanfaidh an breitheamh lena mbaineann nó, de réir mar a bheidh, an comhalta cuí den Gharda Síochána nó an t-oifigeach de chuid na gCoimisinéirí Ioncaim, an doiciméad a éilítear a sholáthar lena tharchur chuig an stát ainmnithe.

(3) I gcás inarb é atá san fhianaise ná doiciméad, déanfar an doiciméad bunaidh nó cóip de a tharchur agus, i gcás inarb é atá ann ná aon ítim eile, déanfar an ítim í féin nó tuairisc uirthi, grianghraf di nó léiriú eile uirthi a tharchur, de réir mar is gá chun an iarraidh a chomhlíonadh.

8 .— (1) Is é nó is í an tAire an tÚdarás Lárnach chun críocha an Achta seo.

(2) Is é feidhm an Údaráis Lárnaigh iarrataí, seachas iarrataí arna ndéanamh faoi Chuid 3, a fháil agus a tharchur, agus déileáil le hiarrataí thairis sin, agus comhoibriú a dhéanamh, de réir na hionstraime idirnáisiúnta iomchuí, le daoine comhfhreagracha nó le comhlachtaí comhfhreagracha i stáit ainmnithe i ndáil le hiarrataí a fhaightear uathu.

(3) Féadfaidh an tAire, má mheasann sé nó sí gur cuí sin, daoine a ainmniú chun feidhmeanna sonraithe de chuid an Údaráis Lárnaigh a chomhlíonadh, agus féadfar daoine éagsúla a ainmniú amhlaidh chun feidhmeanna éagsúla den sórt sin a chomhlíonadh.

(4) Fad atá ainmniú den sórt sin i bhfeidhm, tá tagairt san Acht seo don Údarás Lárnach, a mhéid a bhaineann sí le comhlíonadh feidhme a shonraítear san ainmniú, le forléiriú mar thagairt don duine arna ainmniú nó arna hainmniú amhlaidh chun an fheidhm sin a chomhlíonadh.

(5) Féadfaidh an tAire ainmniú a leasú nó a chúlghairm.

(6) Déanfaidh an tAire, trí fhógra i scríbhinn, ainmneacha aon daoine a bheidh arna n-ainmniú de thuras na huaire faoin alt seo a chur in iúl d’Ardrúnaíocht Chomhairle an Aontais Eorpaigh.

9 .— (1) Gan dochar d’alt 100, féadfaidh an Stiúrthóir Ionchúiseamh Poiblí, Coimisinéir an Gharda Síochána nó na Coimisinéirí Ioncaim (dá ngairtear “an t-údarás soláthair” san alt seo), de réir na hionstraime idirnáisiúnta iomchuí agus gan iarraidh a fháil chuige sin, faisnéis a sheoladh chuig údarás inniúil i stát ainmnithe maidir le nithe a d’fhéadfadh a bheith ina gcúis le hiarraidh den sórt sin nó chun críche imscrúduithe coiriúla reatha nó imeachtaí coiriúla reatha nó chun imscrúduithe nó imeachtaí den sórt sin a thionscnamh.

(2) Féadfaidh an t-údarás soláthair coinníollacha a fhorchur ar úsáid na faisnéise a sheoltar amhlaidh ag an údarás inniúil.

(3) Níl feidhm ag fo-alt (2) i ndáil le húdarás inniúil stáit ainmnithe a bhfuil dearbhú déanta aige faoi mhír 4 d’Airteagal 11 den Dara Prótacal mura rud é, de réir mar a cheanglaítear le dearbhú den sórt sin, go mbeidh fógra roimh ré faoi chineál na faisnéise a bheidh le seoladh faighte ag an údarás agus gur aontaigh sé an fhaisnéis sin a sheoladh.

(4) Maidir le haon choinníollacha a fhorchuireann údarás inniúil i stát ainmnithe ar úsáid faisnéise arna seoladh chuige ag an údarás soláthair, comhlíonfar iad de bhun na hionstraime idirnáisiúnta iomchuí.

(5) San alt seo, aon tagairtí d’údarás inniúil i stát ainmnithe is tagairtí iad don údarás i stát den sórt sin ar dealraitheach don údarás soláthair gurb é an t-údarás cuí é maidir leis an bhfaisnéis lena mbaineann a fháil nó a sheoladh.

10 .— Gan dochar d’alt 11, aisghairtear na forálacha seo a leanas:

(a) Cuid VII (Comhar Idirnáisiúnta) d’Acht 1994 agus an Dara Sceideal (fianaise a thógáil lena húsáid lasmuigh den Stát) a ghabhann leis an Acht sin,

(b) alt 15 (leasú ar Acht 1994) den Acht um Cheartas Coiriúil (Forálacha Ilghnéitheacha) 1997, agus

(c) alt 22 (leasú ar alt 56A d’Acht 1994) den Acht um Cheartas Coiriúil (Cionta Gadaíochta agus Calaoise) 2001.

11 .— (1) Más rud é—

(a) go ndearnadh cúnamh frithpháirteach a sholáthar idir an Stát agus stát eile le foráil de chuid Chuid VII d’Acht 1994, nó faoi fhoráil den sórt sin, roimh aisghairm na Coda sin ar thosach feidhme alt 10 (a), agus

(b) nach bhfuil an Stát arna ainmniú faoi alt 4 chun críocha an chúnaimh sin,

leanfar den chúnamh lena mbaineann a sholáthar faoi réim agus de réir na forála comhréirí den Acht seo agus beidh éifeacht leis an bhforáil sin, dá réir sin, fara aon mhodhnuithe is gá, chun na críche sin.

(2) Folaíonn an tagairt i bhfo-alt (1) do Chuid VII d’Acht 1994 tagairt don Dara Sceideal a ghabhann leis an Acht sin.

(3) Folaíonn tagairtí i bhfo-alt (1) do stát tagairtí do thír nó do chríoch de réir bhrí na Coda sin VII.

CUID 2

Faisnéis faoi Idirbhearta Airgeadais chun críocha Imscrúdaithe Choiriúil

12 .— (1) Sa Chuid seo, ach amháin mar a n-éilíonn an comhthéacs a mhalairt—

ciallaíonn “ cuntas ” cuntas, de chineál ar bith, i bhforas airgeadais, cibé acu sa Stát nó i stát ainmnithe, ar cuntas é a shealbhaíonn duine nó atá faoi rialú duine agus folaíonn sé—

(a) cuntas a shealbhaíonn an duine faoi ainm éagsúil nó faoi leagan éagsúil d’ainm an duine,

(b) cuntas a shealbhaíonn an duine i gcomhpháirt le duine eile,

(c) cuntas a shealbhaíonn duine eile ar cuntas é a bhfuil an duine údaraithe chun oibriú air, cibé acu ar mhodh cumhachta aturnae nó ar shlí eile,

(d) cuntas a shealbhaíonn duine eile (dá ngairtear “cuntas seolta nó faighteora” sa Chuid seo) ar cuntas é ar chuige nó uaidh a rinneadh íocaíochtaí nó atá íocaíochtaí á ndéanamh ó chuntas, nó chuig cuntas, in ainm duine a shonraítear in ordú um fhaisnéis chuntais, agus

(e) aon chuntas eile a shealbhaíonn duine eile, i gcás ina mbeadh faisnéis i ndáil leis iomchuí maidir leis an imscrúdú dá dtagraítear san iarraidh;

ciallaíonn “ ordú um fhaisnéis chuntais ” ordú faoi alt 13 nó 17 á rá go ndéanfaidh foras airgeadais sonraithe, laistigh de thréimhse ama a shonróidh an t-iarratasóir ar an ordú trí fhógra i scríbhinn nó laistigh d’aon fhadú ar an tréimhse ama sin faoi fho-alt (2)—

(a) an méid seo a leanas a lua—

(i) an bhfuil cuntas nó cuntais in ainm nó in ainmneacha duine shonraithe nó daoine sonraithe nó i leagan éagsúil sonraithe nó i leaganacha éagsúla sonraithe den ainm nó de na hainmneacha sin á shealbhú nó á sealbhú san fhoras airgeadais, agus

(ii) an bhfuil sé tar éis teacht ar eolas, i ngnáthchúrsa gnó, faoi aon chuntas nó cuntais eile san fhoras a bhfuil an duine sonraithe nó na daoine sonraithe údaraithe chun oibriú air, cibé acu ar mhodh cumhachta aturnae nó ar shlí eile,

agus

(b) má tá, aon fhaisnéis atá aige nó aici i ndáil le haon chuntas nó cuntais den sórt sin agus i ndáil le haon chuntais seolta nó faighteora, lena n-áirítear mionsonraí faoi aon oibríochtaí ar an gcuntas nó ar na cuntais sin, de réir mar a shonraítear san ordú, le linn aon tréimhse a shonraítear amhlaidh a sholáthar don iarratasóir nó d’ainmnitheach an iarratasóra ar mhodh agus i bhfoirm a shonraítear san fhógra;

ciallaíonn “ ordú um fhaireachán cuntais ” ordú faoi alt 13 nó 17 á rá go gcuirfidh foras airgeadais sonraithe ar chumas an iarratasóra ar an ordú chun faireachán a dhéanamh, le linn tréimhse áirithe, agus ar mhodh agus i bhfoirm, a shonróidh an t-iarratasóir trí fhógra i scríbhinn, ar aon oibríochtaí arna sonrú amhlaidh agus atá á ndéanamh ar chuntas nó ar chuntais in ainm sonraithe nó in ainmneacha sonraithe nó i leagan éagsúil sonraithe nó i leaganacha éagsúla sonraithe den ainm nó de na hainmneacha sin san fhoras airgeadais;

ciallaíonn “ foras airgeadais ”—

(a) má tá an foras airgeadais sa Stát—

(i) duine a shealbhaíonn nó a shealbhaigh ceadúnas ó Bhanc Ceannais agus Údarás Seirbhísí Airgeadais na hÉireann faoi alt 9 d’Acht an Bhainc Ceannais 1971,

(ii) duine dá dtagraítear in alt 7(4) den Acht sin, nó

(iii) foras creidmheasa (de réir bhrí Rialacháin na gComhphobal Eorpach (Forais Chreidmheasa a Cheadúnú agus a Mhaoirsiú) 1992 (I.R. Uimh. 395 de 1992)) atá údaraithe ag an Údarás sin chun gnó forais creidmheasa a sheoladh de réir na n-achtachán maoirseachta de réir bhrí na Rialachán sin,

nó

(b) má tá an foras airgeadais i stát ainmnithe, banc nó foras airgeadais neamhbhainc;

ciallaíonn “ foirm ”, san áit a bhfuil sé sa mhíniú ar ordú um fhaisnéis chuntais agus ar ordú um fhaireachán cuntais, foirm—

(a) atá buan agus inléite, cibé acu a rinneadh nó nach ndearnadh í a aistriú chuig foirm den sórt sin ó fhoirm leictreonach nó ó fhoirm neamh-inléite, nó

(b) má shonraíonn an t-iarratasóir ar ordú den sórt sin amhlaidh, atá i bhfoirm leictreonach nó i bhfoirm neamh-inléite eile atá inaistrithe chuig foirm bhuan agus inléite;

maidir le “cion polaitiúil”—

(a) folaíonn sé cion atá bainteach le cion polaitiúil,

(b) ní fholaíonn sé—

(i) cion lena mbaineann alt 3 den Acht um Eiseachadadh (An Coinbhinsiún Eorpach chun Sceimhliú a Dhíchur) 1987 (“Acht 1987”), nó

(ii) cion, arna mhíniú i bhfo-alt (3), arb é atá ann ná comhcheilg nó comhlachú maidir le cion den sórt sin a dhéanamh;

ciallaíonn “ Prótacal 2001 ” Prótacal an 16 Deireadh Fómhair 2001 a ghabhann le Coinbhinsiún 2000;

tá le “ cuntas seolta nó faighteora ” an bhrí a thugtar dó le mír (d) den mhíniú ar “cuntas”.

(2) Maidir leis an tréimhse ama a shonraíonn iarratasóir ar ordú um fhaisnéis chuntais—

(a) is tréimhse ama í a bhféadfar a bheith ag súil ina leith go soláthróidh foras airgeadais an fhaisnéis a shonraítear san ordú laistigh di, agus

(b) féadfar í a fhadú ar feadh tréimhse a shonróidh an t-iarratasóir i bhfógra breise i scríbhinn, tar éis dul i gcomhairle leis an bhforas airgeadais lena mbaineann.

(3) Maidir leis an gcion comhcheilge nó maidir leis an gcion comhlachaithe dá dtagraítear i mír (b)(ii) den mhíniú ar “cion polaitiúil”, is cion é—

(a) arb é atá ann an t-iompar a thuairiscítear in Airteagal 3(4) den Choinbhinsiún a bhaineann le hEiseachadadh idir Ballstáit an Aontais Eorpaigh, arna dhéanamh sa Bhruiséil an 27 Meán Fómhair 1996, eadhon, iompar ag duine ar iompar é a chuidíonn le grúpa daoine ag gníomhú dóibh de chomhchuspóir na nithe seo a leanas a dhéanamh—

(i) cion amháin nó níos mó i réimse na sceimhlitheoireachta de réir mar atá luaite in Airteagail 1 agus 2 de Choinbhinsiún Sceimhlitheoireachta 1977, gáinneáil ar dhrugaí nó cineálacha eile coireachta eagraithe, nó

(ii) gníomhartha eile foréigin in aghaidh beatha, iomláine choirp nó saoirse duine nó gníomhartha eile foréigin lena gcruthaítear comhchontúirt do dhaoine,

agus

(b) atá inphionóis, fiú mura nglacann an duine páirt i ndéanamh iarbhír an chiona nó na gcionta, le téarma príosúnachta ar feadh tréimhse 12 mhí nó le pionós is déine ná sin

más rud é, maidir leis an gcuidiú sin, gur chuidiú d’aon ghnó é agus gur thug an duine é agus eolas aige nó aici faoi chuspóir agus faoi ghníomhaíocht choiriúil ghinearálta an ghrúpa nó faoi é a bheith ar intinn aige an cion nó na cionta lena mbaineann a dhéanamh.

(4) An tagairt san alt seo d’alt 3 d’Acht 1987 is tagairt í don alt sin arna leasú le halt 2 den Acht um Eiseachadadh (Leasú) 1994 agus le hailt 12 agus 27 den Acht um Eiseachadadh (Coinbhinsiúin an Aontais Eorpaigh) 2001.

Faisnéis faoi idirbhearta airgeadais ar faisnéis í atá le húsáid sa Stát

13 .— (1) Chun críocha imscrúdaithe choiriúil sa Stát, féadfaidh comhalta den Gharda Síochána nach ísle céim ná cigire iarratas a dhéanamh ex parte chuig breitheamh den Ard-Chúirt ar ordú um fhaisnéis chuntais nó ordú um fhaireachán cuntais nó ar an dá ordú sin.

(2) Féadfaidh baint a bheith ag an iarratas—

(a) le gach foras airgeadais sa Stát nó sa stát ainmnithe lena mbaineann,

(b) le hearnáil nó le hearnálacha foras airgeadais den sórt sin, nó

(c) le foras airgeadais áirithe den sórt sin nó le forais airgeadais áirithe den sórt sin.

(3) Maidir leis an ordú nó na horduithe a mbeidh iarratas déanta orthu i ndáil leis an bhforas airgeadais nó leis na forais airgeadais a bheidh sonraithe san iarratas, féadfaidh an breitheamh é nó iad a dhéanamh más deimhin leis nó léi—

(a) go bhfuil imscrúdú á dhéanamh ag an nGarda Síochána i dtaobh na nithe seo a leanas—

(i) an bhfuil cion déanta ag duine sonraithe, nó

(ii) an bhfuil seilbh nó rialú ag duine sonraithe ar shócmhainní nó ar fháltais a éiríonn as iompar coiriúil,

agus

(b) go bhfuil forais réasúnacha ann chun a chreidiúint—

(i) go bhféadfadh sé go bhfuil faisnéis atá ag teastáil chun críocha an imscrúdaithe ag an bhforas airgeadais nó ag na forais airgeadais lena mbaineann, agus

(ii) gurb é leas an phobail é go ndéanfaí aon fhaisnéis den sórt sin a nochtadh chun na gcríoch sin, ag féachaint don tairbhe is dóigh a bheadh ann don imscrúdú agus ag féachaint d’aon imthosca iomchuí eile.

(4) Maidir le hordú faoin alt seo, beidh dóthain faisnéise ann i ndáil le haon chuntas arna shonrú ann chun gur féidir leis an bhforas airgeadais lena mbaineann an cuntas a shainaithint.

(5) Tá éifeacht le hordú faoin alt seo d’ainneoin aon oibleagáide maidir le rúndacht nó d’ainneoin aon sriain eile ar nochtadh a fhorchuirtear le reacht nó ar shlí eile.

(6) Maidir le fógra i scríbhinn arna thabhairt d’fhoras airgeadais de bhun ordaithe faoin alt seo, ar ordú é ina sonraítear oibríochtaí ar chuntais arna gcoimeád san fhoras sin, féadfaidh an t-iarratasóir ar an ordú é a mhodhnú, i gcomhairle leis an bhforas airgeadais, chun nach ndéanfaidh an foras sin, a mhéid is indéanta, faisnéis a sholáthar nach bhfuil iomchuí maidir leis an imscrúdú coiriúil lena mbaineann.

(7) Maidir le haon fhaisnéis arna soláthar ag foras airgeadais sa Stát i gcomhlíonadh ordaithe faoin alt seo, níl sí inghlactha i bhfianaise i gcoinne an fhorais airgeadais, ach amháin in aon imeachtaí i leith ciona faoi alt 21 (1)(b).

14 .— (1) I gcás ina mbaineann ordú um fhaisnéis chuntais nó ordú um fhaireachán cuntais le faisnéis maidir le cuntas nó le cuntais i bhforas airgeadais i stát ainmnithe, féadfaidh an Stiúrthóir Ionchúiseamh Poiblí an t-ordú a chur chuig an Údarás Lárnach lena tharchur chuig údarás inniúil sa stát sin, maille le hiarraidh ón Stiúrthóir an fhaisnéis lena mbaineann an t-ordú a sholáthar.

(2) D’ainneoin fo-alt (1), féadfaidh an Stiúrthóir iarraidh a dhéanamh go díreach chuig údarás inniúil i stát ainmnithe ar iarraidh í ar aon fhaisnéis a sholáthar a bhféadfadh baint a bheith ag ordú um fhaisnéis chuntais nó ag ordú um fhaireachán cuntais léi má tá imscrúdú coiriúil ar siúl sa Stát agus má tá forais réasúnacha ag an Stiúrthóir chun a chreidiúint—

(a) go bhféadfadh sé go bhfuil faisnéis atá ag teastáil chun críocha an imscrúdaithe ag foras airgeadais nó ag forais airgeadais sa stát ainmnithe, agus

(b) gurb é leas an phobail é go ndéanfaí aon fhaisnéis den sórt sin a nochtadh chun na gcríoch sin, ag féachaint don tairbhe is dóigh a bheadh ann don imscrúdú agus ag féachaint d’aon imthosca iomchuí eile.

(3) Beidh an méid seo a leanas san áireamh in aon iarraidh faoin alt seo—

(a) ráiteas ón Stiúrthóir á rá go bhfuil imscrúdú ar siúl maidir le cion sonraithe agus gur ábhar don imscrúdú an duine atá luaite san iarraidh, agus

(b) an fhaisnéis seo a leanas:

(i) cén fáth a measann an Stiúrthóir gur dóigh go mbeidh luach substaintiúil, chun críocha an imscrúdaithe, ag gabháil leis an bhfaisnéis iarrtha;

(ii) cén fáth a measann sé nó sí go bhféadfadh sé go gcoimeádann foras airgeadais nó forais airgeadais sa stát ainmnithe an cuntas nó na cuntais lena mbaineann;

(iii) má tá siad ar fáil, ainm nó ainmneacha an fhorais sin nó na bhforas sin;

(iv) an tréimhse uasta príosúnachta a dhlitear, ar dhuine a chiontú sa chion, a chur ar dhuine láninniúil nár ciontaíodh roimhe sin;

(v) an t-ábhar atá luaite i bhfo-ailt (4) agus (5); agus

(vi) aon fhaisnéis eile a d’fhéadfadh comhlíonadh na hiarrata a éascú.

(4) Ní dhéanfar faisnéis a fhaightear mar fhreagra ar iarraidh faoin alt seo a úsáid, gan toiliú an údaráis inniúil, chun aon chríche seachas an chríoch a cheadaítear leis an ionstraim idirnáisiúnta iomchuí.

(5) Nuair nach mbeidh aon fhaisnéis den sórt sin ag teastáil a thuilleadh chun na críche sin (nó chun aon chríche eile a mbeidh an toiliú sin faighte ina leith), tabharfar ar ais í don údarás inniúil mura rud é go gcuireann an t-údarás in iúl nach gá í a thabhairt ar ais.

Faisnéis faoi idirbhearta airgeadais ar faisnéis í atá le húsáid i stát ainmnithe

15 .— (1) Tá feidhm ag an alt seo maidir le hiarraidh ar fhaisnéis i ndáil le haon chuntas nó cuntais a d’fhéadfadh a bheith arna shealbhú nó arna sealbhú i bhforas airgeadais sa Stát ag duine is ábhar d’imscrúdú coiriúil i stát ainmnithe.

(2) Beidh an méid seo a leanas san áireamh san iarraidh—

(a) ráiteas á rá go ndearnadh cion sonraithe sa stát ainmnithe lena mbaineann agus gur ábhar d’imscrúdú maidir leis an gcion an duine atá luaite san iarraidh,

(b) ráiteas á rá—

(i) nach ndéanfar aon fhaisnéis a sholáthrófar mar fhreagra ar an iarraidh a úsáid, gan toiliú roimh ré ón Aire, chun aon chríche seachas an chríoch a bheidh sonraithe san iarraidh, agus

(ii) go ndéanfar an taifead ar aon fhaisnéis den sórt sin a thabhairt ar ais nuair nach mbeidh sé ag teastáil a thuilleadh chun na críche a shonrófar amhlaidh (nó chun aon chríche eile a mbeidh an toiliú sin faighte ina leith) mura rud é go gcuirfidh an tAire in iúl nach gá é a thabhairt ar ais,

agus

(c) an fhaisnéis seo a leanas:

(i) cén fáth a measann an t-údarás iarrthach gur dóigh go mbeidh luach substaintiúil, chun críocha an imscrúdaithe, ag gabháil leis an bhfaisnéis iarrtha;

(ii) cén fáth a measann sé go bhféadfadh sé go sealbhaíonn foras airgeadais nó forais airgeadais sa Stát an cuntas nó na cuntais lena mbaineann;

(iii) má tá siad ar fáil, ainm nó ainmneacha an fhorais sin nó na bhforas sin;

(iv) an tréimhse uasta príosúnachta faoi dhlí an stáit ainmnithe arb í an tréimhse í atá inchurtha mar phionós i leith an chiona; agus

(v) aon fhaisnéis eile a d’fhéadfadh comhlíonadh na hiarrata a éascú.

(3) I bhfo-alt (1), folaíonn “ faisnéis ”—

(a) faisnéis i dtaobh an gcoinníonn foras airgeadais sa Stát cuntas nó cuntais a luaitear san fho-alt sin,

(b) mionsonraí faoi aon chuntas nó cuntais den sórt sin,

(c) mionsonraí faoi oibríochtaí ar aon chuntas nó cuntais den sórt sin le linn tréimhse áirithe.

16 .— Féadfaidh an tAire, má tá sé nó sí den tuairim go gcomhlíonann an iarraidh alt 15 , a údarú do chomhalta den Gharda Síochána nach ísle céim ná cigire iarratas a dhéanamh chuig breitheamh den Ard-Chúirt ar ordú um fhaisnéis chuntais nó ar ordú um fhaireachán cuntais, nó ar an dá ordú sin, i leith na faisnéise a iarrtar.

17 .— (1) Tar éis údarú faoi alt 16 a fháil, féadfaidh comhalta den Gharda Síochána nach ísle céim ná cigire iarratas a dhéanamh ex parte agus ar shlí seachas go poiblí chuig breitheamh den Ard-Chúirt ar ordú um fhaisnéis chuntais nó ar ordú um fhaireachán cuntais nó ar an dá ordú sin.

(2) Maidir leis an iarratas—

(a) féadfaidh baint a bheith aige—

(i) le gach foras airgeadais sa Stát,

(ii) le hearnáil nó le hearnálacha foras airgeadais den sórt sin, nó

(iii) le foras airgeadais áirithe den sórt sin nó le forais airgeadais áirithe den sórt sin,

agus

(b) beidh cóip den iarraidh lena mbaineann agus d’aon doiciméid tacaíochta nó doiciméid ghaolmhara ag gabháil leis.

(3) Féadfaidh an breitheamh an t-ordú nó na horduithe a ndéantar iarratas orthu i ndáil leis an bhforas airgeadais nó leis na forais airgeadais a shonraítear san iarratas a dhéanamh más deimhin leis nó léi—

(a) go bhfuil forais réasúnacha ann chun a chreidiúint go ndearnadh cion faoi dhlí an stáit ainmnithe lena mbaineann,

(b) gurb é nó gurb í an duine a luaitear san iarraidh is ábhar d’imscrúdú maidir leis an gcion,

(c) go bhfuil an iarraidh, thairis sin, de réir na hionstraime idirnáisiúnta iomchuí, agus

(d) go bhfuil forais réasúnacha ann chun a chreidiúint go bhféadfadh sé go bhfuil faisnéis atá ag teastáil chun críocha an imscrúdaithe ag an bhforas airgeadais sonraithe nó ag na forais airgeadais shonraithe.

(4) Maidir le hordú faoin alt seo, beidh dóthain faisnéise ann i ndáil le haon chuntas arna shonrú ann chun gur féidir leis an bhforas airgeadais lena mbaineann an cuntas a shainaithint.

(5) Tá éifeacht le hordú faoin alt seo d’ainneoin aon oibleagáide maidir le rúndacht nó d’ainneoin aon sriain eile arna fhorchur le reacht nó ar shlí eile.

(6) Maidir le haon fhaisnéis a sholáthróidh foras airgeadais i gcomhlíonadh ordaithe den sórt sin, níl sí inghlactha i bhfianaise ina choinne, ach amháin in aon imeachtaí i leith ciona faoi alt 21 (1)(b).

18 .— Déanfar faisnéis arna nochtadh ag foras airgeadais i gcomhlíonadh ordaithe um fhaisnéis chuntais nó ordaithe um fhaireachán cuntais faoi alt 17 a tharchur chuig an údarás iarrthach lena mbaineann de réir socruithe arna gceadú ag an Aire.

19 .— Le linn iarraidh faoin gCuid seo a fhorghníomhú, déanfaidh Coimisinéir an Gharda Síochána, má tá sé nó sí den tuairim go bhféadfadh sé gur cuí imscrúduithe a ghabháil de láimh nach rabhthas ag súil leo i dtosach nó nach bhféadfaí a shonrú nuair a rinneadh an iarraidh, an méid sin a chur in iúl don údarás iarrthach.

Forlíontach

20 .— (1) Féadfaidh breitheamh den Ard-Chúirt ordú um fhaisnéis chuntais nó ordú um fhaireachán cuntais a athrú nó a urscaoileadh ar iarratas a fháil—

(a) ó chomhalta den Gharda Síochána nach ísle céim ná cigire, nó

(b) ó aon fhoras airgeadais dá ndéanann an t-ordú difear.

(2) I gcás ina mbaineann an t-iarratas le hordú faoi alt 17 , déanfaidh an breitheamh socrú chun fógra a thabhairt don údarás inniúil sa stát ainmnithe lena mbaineann—

(a) maidir leis an iarratas agus maidir leis na forais lena dhéanamh, ionas go gcumasófar don údarás aon argóintí a mheasann sé is gá a chur i láthair ag éisteacht an iarratais, agus

(b) maidir le toradh an iarratais.

(3) Déanfar an t-iarratas a éisteacht ar shlí seachas go poiblí.

21 .— (1) Tá foras airgeadais sa Stát ciontach i gcion—

(a) más rud é, gan leithscéal réasúnach, nach gcomhlíonann sé ordú um fhaisnéis chuntais nó ordú um fhaireachán cuntais, nó

(b) más rud é, agus é ag airbheartú go bhfuil ordú den sórt sin á chomhlíonadh aige—

(i) go ndéanann sé ráiteas is eol dó a bheith bréagach nó míthreorach i bponc ábhartha, nó

(ii) go ndéanann sé ráiteas go meargánta atá bréagach nó míthreorach i bponc den sórt sin.

(2) Is fo-alt é fo-alt (1) atá gan dochar don dlí a bhaineann le díspeagadh cúirte.

(3) Tá foras airgeadais sa Stát agus aon duine is stiúrthóir, nó oifigeach nó fostaí eile, de chuid an fhorais ciontach i gcion más rud é go ndéanann an foras nó an duine, agus eolas aige nó aici nó amhras air nó uirthi go ndearnadh iarratas faoin gCuid seo ar ordú um fhaisnéis chuntais nó ar ordú um fhaireachán cuntais nó ar an dá ordú sin, aon nochtadh a dhéanann dochar, nó ar dóigh dó dochar a dhéanamh, don imscrúdú coiriúil arb é is cúis leis an iarratas.

(4) In imeachtaí i leith ciona faoi fho-alt (3), is cosaint don fhoras airgeadais nó don duine a chruthú maidir leis an bhforas nó maidir leis an duine—

(a) nárbh eol dó nó di, nó nach raibh amhras air nó uirthi, go ndearna, nó gur dhóigh go ndéanfadh, an nochtadh lena mbaineann na himeachtaí dochar don imscrúdú coiriúil lena mbaineann, nó

(b) go raibh údarás dlíthiúil nó leithscéal réasúnach aige nó aici chun an nochtadh a dhéanamh.

(5) Aon duine atá ciontach i gcion faoi fho-alt (3), dlífear—

(a) ar é nó í a chiontú go hachomair, fíneáil nach mó ná €5,000 nó príosúnacht ar feadh téarma nach faide ná 12 mhí, nó iad araon, a chur air nó uirthi, agus

(b) ar é nó í a chiontú ar díotáil, fíneáil nó príosúnacht ar feadh téarma nach faide ná 5 bliana, nó iad araon, a chur air nó uirthi.

(6) Aon fhoras airgeadais atá ciontach i gcion faoin alt seo, dlífear—

(a) ar é a chiontú go hachomair, fíneáil nach mó ná €5,000 a chur air, agus

(b) ar é a chiontú ar díotáil, fíneáil a chur air.

CUID 3

Teachtaireachtaí Teileachumarsáide a Thascradh

Réamhráiteach

22 .— Sa Chuid seo, mura n-éilíonn an comhthéacs a mhalairt—

ciallaíonn “ Acht 1983 ” an tAcht Seirbhísí Poist agus Teileachumarsáide 1983;

ciallaíonn “ Acht 1993 ” an tAcht um Post-Phaicéid agus Teachtaireachtaí Teileachumarsáide a Thascradh (Rialáil) 1993;

ciallaíonn “ údarás inniúil ” an duine nó an comhlacht i mballstát arb é nó arb í an t-údarás inniúil é nó í chun críocha Theideal III de Choinbhinsiún 2000, nó arb é nó arb í an t-údarás inniúil sin é nó í i dtuairim an Aire;

ciallaíonn “ tascradh ” tascradh teachtaireachtaí teileachumarsáide chuig duine nó ó dhuine a shonraítear san údarú chun tascradh a dhéanamh ag seoladh teileachumarsáide arna shonrú amhlaidh;

tá le “ seoladh teileachumarsáide ” an bhrí atá leis in Acht 1993.

Iarrataí ar thascradh i gcás inar gá cúnamh teicniúil

23 .— (1) Tá feidhm ag an alt seo más rud é—

(a) chun críche imscrúdaithe choiriúil, go mbeidh údarú tugtha ag an Aire chun tascradh a dhéanamh faoi alt 2 d’Acht 1993,

(b) go bhfuil an duine a shonraítear san údarú i láthair sa Stát nó i mballstát, agus

(c) go bhfuil gá le cúnamh teicniúil ó bhallstát chun na teachtaireachtaí teileachumarsáide lena mbaineann a thascradh.

(2) I gcás ina bhfuil feidhm ag an alt seo, féadfaidh an tAire a chur faoi deara iarraidh a dhéanamh chuig údarás inniúil sa bhallstát ar iarraidh í—

(a) ar an údarás sin do thascradh teachtaireachtaí teileachumarsáide chuig an seoladh teileachumarsáide lena mbaineann nó ón seoladh sin agus do tharchur na dteachtaireachtaí sin láithreach go dtí Coimisinéir an Gharda Síochána nó go dtí comhalta den Gharda Síochána arna ainmniú nó arna hainmniú aige nó aici, nó

(b) ar thascradh agus ar thaifeadadh na dteachtaireachtaí agus an taifeadadh a tharchur chuig an gCoimisinéir nó chuig an gcomhalta.

(3) Maidir leis an iarraidh—

(a) daingneofar inti gur thug an tAire údarú faoi Acht 1993 chun tascradh a dhéanamh chun críche imscrúdaithe choiriúil,

(b) tabharfar dóthain faisnéise inti chun an duine a bhfuil a theachtaireachtaí nó a teachtaireachtaí teileachumarsáide le tascradh a shainaithint,

(c) tabharfar léiriú inti ar an iompar coiriúil atá á imscrúdú,

(d) luafar inti an fad a n-iarrtar ina leith gurb é an fad é a mhairfidh an tascradh,

(e) soláthrófar dóthain sonraí teicniúla inti, lena n-áirítear uimhir nasctha líonra an tseolta teileachumarsáide lena mbaineann, chun a chinntiú gur féidir an iarraidh a chomhlíonadh, agus

(f) más rud é, maidir leis an iarraidh—

(i) go mbaineann sí le duine sonraithe atá i láthair sa bhallstát lena mbaineann, nó

(ii) gur iarraidh faoi fho-alt (2)(b) í,

soláthrófar inti achoimre ar na fíorais a bhaineann leis an gcion atá á imscrúdú agus aon fhaisnéis eile a éileoidh an t-údarás inniúil chun a chumasú dó cinneadh a dhéanamh i dtaobh an údaródh sé an tascradh iarrtha in imthosca den tsamhail chéanna.

(4) Má bhaineann an iarraidh le duine atá i láthair i mballstát seachas an ballstát ar a n-éilítear an cúnamh teicniúil, tabharfar fógra faoin údarú don bhallstát eile sin de réir alt 26 .

(5) Meastar, maidir le faisnéis a fhaightear mar fhreagra ar an iarraidh, gur faisnéis oifigiúil í chun críocha an Achta um Rúin Oifigiúla 1963.

(6) Chun deireadh a chur le hamhras, dearbhaítear go bhféadfar údarú a thabhairt faoi alt 2 d’Acht 1993 i gcás duine a bhfuil a theachtaireachtaí nó a teachtaireachtaí teileachumarsáide le tascradh a bheith i láthair i mballstát.

24 .— (1) Tá feidhm ag an alt seo más rud é—

(a) go bhfuil imscrúdú coiriúil ar siúl i mballstát,

(b) go bhfuiltear tar éis ordú nó barántas dleathach tascartha chun tascradh a dhéanamh ar theachtaireachtaí teileachumarsáide chuig duine sonraithe nó ó dhuine sonraithe nó chuig seoladh teileachumarsáide nó ó sheoladh teileachumarsáide a eisiúint sa bhallstát i dtaca leis an imscrúdú,

(c) go ndéanann údarás inniúil sa bhallstát iarraidh chuig an Aire—

(i) ar theachtaireachtaí teileachumarsáide chuig an seoladh teileachumarsáide lena mbaineann nó ón seoladh sin a thascradh agus a tharchur láithreach chuig an údarás nó chuig duine arna ainmniú nó arna hainmniú aige, nó

(ii) ar na teachtaireachtaí a thascradh agus a thaifeadadh agus an taifeadadh a tharchur chuig an údarás nó chuig an duine arna ainmniú nó arna hainmniú aige, agus

(d) maidir leis an duine sonraithe—

(i) go bhfuil sé nó sí i láthair sa bhallstát nó i mballstát eile agus go bhfuil gá ag an údarás inniúil sa bhallstát céadluaite le cúnamh teicniúil an Stáit chun na teachtaireachtaí teileachumarsáide a thascradh, nó

(ii) go bhfuil sé nó sí i láthair sa Stát agus gur féidir an tascradh a dhéanamh ann.

(2) Maidir leis an iarraidh—

(a) déanfar ainm an údaráis inniúil a thaispeáint inti,

(b) daingneofar léi gur eisíodh ordú nó barántas dleathach tascartha i dtaca le himscrúdú coiriúil,

(c) tabharfar dóthain faisnéise inti chun an duine a bhfuil a theachtaireachtaí nó a teachtaireachtaí teileachumarsáide le tascradh a shainaithint,

(d) tabharfar léiriú inti ar an iompar coiriúil atá á imscrúdú,

(e) luafar inti an fad a n-iarrtar ina leith gurb é an fad é a mhairfidh an tascradh,

(f) soláthrófar dóthain sonraí teicniúla inti, lena n-áirítear uimhir nasctha líonra an tseolta teileachumarsáide lena mbaineann, chun a chinntiú gur féidir an iarraidh a chomhlíonadh, agus

(g) má tá an duine i láthair i mballstát seachas an ballstát inar eisíodh an t-ordú nó an barántas dleathach tascartha, agus ar ballstát é nach gá cúnamh teicniúil uaidh chun an tascradh a dhéanamh, daingneofar inti gur cuireadh an t-ordú nó an barántas in iúl don bhallstát sin de bhun Airteagal 20(2)(a) de Choinbhinsiún 2000.

(3) Más rud é—

(a) go bhfuil an duine a bhfuil a theachtaireachtaí nó a teachtaireachtaí teileachumarsáide le tascradh i láthair sa Stát, nó

(b) gur iarraidh í chun na teachtaireachtaí a thascradh agus a thaifeadadh agus an taifeadadh a tharchur,

folóidh an iarraidh freisin achoimre ar na fíorais a bhaineann leis an gcion atá á imscrúdú agus aon fhaisnéis bhreise a éileoidh an tAire chun a chumasú dó nó di cinneadh a dhéanamh i dtaobh arbh ionann an t-iompar arb é an cion é, dá dtarlódh sé sa Stát, agus cion tromaí de réir bhrí Acht 1993, agus go dtabharfadh sé bonn cirt thairis sin chun údarú a thabhairt faoin Acht sin.

25 .— (1) Faoi réir fho-alt (3), i gcás inar iarraidh í ar theachtaireachtaí teileachumarsáide sonraithe a thascradh agus a tharchur láithreach, féadfaidh an tAire údarú a thabhairt maidir leis an tascradh más dóigh leis nó léi go bhfuil feidhm ag alt 24 agus go gcomhlíontar é sa chás áirithe.

(2) Faoi réir fho-alt (3), más rud é—

(a) gur iarraidh í ar theachtaireachtaí teileachumarsáide sonraithe a thascradh agus a thaifeadadh agus ar an taifeadadh a tharchur, agus

(b) nach féidir an tascradh a tharchur láithreach—

(i) ón Stát,

(ii) chuig an mballstát, nó

(iii) sa dá chás sin,

féadfaidh an tAire údarú a thabhairt maidir leis an tascradh más dóigh leis nó léi go bhfuil feidhm ag alt 24 agus go gcomhlíontar é i ndáil leis an gcás áirithe.

(3) Más rud é, i gcás dá dtagraítear i bhfo-alt (1) nó (2), go bhfuil an duine arb é nó í is ábhar don iarraidh i láthair sa Stát, ní fhéadfaidh an tAire údarú a thabhairt maidir leis an tascradh ach amháin más dóigh leis nó léi—

(a) gurbh ionann an t-iompar atá á imscrúdú sa stát iarrthach agus cion tromaí de réir bhrí Acht 1993 dá dtarlódh sé sa Stát agus go dtabharfadh sé bonn cirt thairis sin chun údarú a thabhairt faoin Acht sin, agus

(b) go bhfuil feidhm ag alt 24 agus go gcomhlíontar é i ndáil leis an gcás áirithe.

(4) Má dhéanann an Stát dearbhú faoi Choinbhinsiún 2000 á rá go bhfuil sé faoi cheangal ag mír 6 (dá dtugtar éifeacht le fo-ailt (2) agus (3)) d’Airteagal 18 den Choinbhinsiún ach sin sa chás amháin nach féidir an tascradh lena mbaineann a tharchur láithreach ón Stát, scoireann míreanna (b)(ii) agus (b)(iii) d’fho-alt (2) air sin d’éifeacht a bheith leo.

(5) I gcás ina bhfuil an duine is ábhar don iarraidh i láthair sa Stát, féadfaidh an tAire an t-údarú a chur faoi réir aon choinníll (lena n-áirítear coinníoll a bhaineann le húsáid na dteachtaireachtaí tascartha) a mbeadh feidhm aige dá mba údarú é arna thabhairt faoi alt 2 d’Acht 1993 i ndáil le duine atá i láthair sa Stát.

(6) I gcás ina dtabharfar údarú, déanfaidh Coimisinéir an Gharda Síochána socrú—

(a) go dtarchuirfear na teachtaireachtaí teileachumarsáide lena mbaineann chuig an údarás inniúil sa bhallstát nó chuig duine arna ainmniú nó arna hainmniú ag an údarás sin, nó

(b) de réir mar is cuí, go ndéanfar na teachtaireachtaí a thaifeadadh agus an taifeadadh a tharchur chuig an údarás nó an duine sin.

(7) Le linn breithniú a dhéanamh ar aon iarraidh faoi Airteagal 18.8 de Choinbhinsiún 2000 ar athscríbhinn ar thaifeadadh den sórt sin tabharfaidh an tAire aird ar imthosca go léir an cháis áirithe; agus féadfar deonú aon iarrata den sórt sin a chur faoi réir aon choinníll a bhféadfadh údarú chun tascradh a dhéanamh a bheith faoina réir.

(8) Meastar gur údarú faoi alt 2 d’Acht 1993 an t-údarú, agus tá éifeacht leis an Acht sin agus le halt 110 d’Acht 1983 (a mhéid a bhaineann sé le hordacháin a bhaineann le húdaruithe den sórt sin) dá réir sin, fara aon mhodhnuithe is gá, chun gach críche amhail is dá mba faoi Acht 1993 agus Acht 1983 a tugadh an t-údarú agus aon ordacháin den sórt sin.

Fógraí faoi thascarthaí eile

26 .— (1) Más rud é—

(a) chun críche imscrúdaithe choiriúil, go mbeidh údarú chun tascradh a dhéanamh tugtha ag an Aire faoi alt 2 d’Acht 1993,

(b) go bhfuil seoladh teileachumarsáide an duine a shonraítear san údarú á úsáid i gcríoch ballstáit, agus

(c) nach gá cúnamh teicniúil a fháil ón mballstát chun an tascradh a dhéanamh,

tabharfaidh an tAire fógra maidir leis an údarú don údarás inniúil sa bhallstát—

(i) roimh an tascradh, más eol don Aire an tráth sin go bhfuil an duine i láthair sa chríoch sin, nó

(ii) in aon chás eile, díreach tar éis don Aire teacht ar an eolas sin.

(2) Beidh an fhaisnéis seo a leanas san fhógra:

(a) daingniú gur tugadh údarú le barántas faoi alt 2 d’Acht 1993 chun tascradh a dhéanamh i dtaca le himscrúdú coiriúil;

(b) sonraí is leor chun an duine is ábhar don tascradh a shainaithint;

(c) léiriú ar an iompar coiriúil atá á imscrúdú; agus

(d) fad measta an tascartha.

(3) Déanfaidh an tAire aon choinníoll, aon cheanglas nó aon iarraidh a fhorchuirfidh nó a dhéanfaidh an t-údarás inniúil i ndáil leis an tascradh de bhun Airteagal 20.4 de Choinbhinsiún 2000 a chomhlíonadh.

(4) Go dtí go ndéanfaidh an t-údarás inniúil cinneadh i dtaobh an dtabharfar toiliú leis an tascradh nó le leanúint leis—

(a) féadfar leanúint le haon tascradh atá á dhéanamh, ach

(b) ní fhéadfar ábhar arna thascradh a úsáid mura rud é—

(i) go gcomhaontaítear a mhalairt idir an tAire agus an t-údarás inniúil, nó

(ii) go ndéantar amhlaidh i dtaca le bearta práinneacha a dhéanamh chun bagairt láithreach thromaí ar shlándáil an phobail a chosc (lena n-áirítear bearta i leith aon chiona thromaí), agus sa chás sin tabharfaidh an tAire fógra don údarás inniúil faoi aon úsáid den sórt sin agus faoi na cúiseanna lena bhfírinnítear an úsáid.

(5) I bhfo-alt (4)(b)(ii), ciallaíonn “ cion tromaí ” cion a shonraítear sa Sceideal a ghabhann leis an Acht um Bannaí 1977 ar cion é a bhféadfar duine láninniúlachta nár ciontaíodh roimhe a phionósú ina leith le téarma príosúnachta ar feadh téarma 5 bliana nó le pionós is déine ná sin.

(6) Má iarrann an t-údarás inniúil amhlaidh, déanfaidh an tAire achoimre ar fhíorais an cháis a sholáthar dó mar aon le haon fhaisnéis bhreise is gá chun a chumasú dó cinneadh a dhéanamh i dtaobh an údaródh sé tascradh in imthosca den tsamhail chéanna.

(7) Is fo-alt é fo-alt (6) atá gan dochar d'fho-alt (4), mura rud é go n-aontaítear a mhalairt idir an tAire agus an t-údarás inniúil.

(8) I gcás inar dóigh leis an Aire go bhfuil an fhaisnéis atá le soláthar faoi fho-alt (2) de chineál atá sách íogair, féadfar an fhaisnéis, le comhaontú an údaráis inniúil lena mbaineann, a tharchur chuige trí dhuine sonrach nó trí chomhlacht sonrach.

(9) Níl feidhm ag an alt seo maidir le ballstát a mbeidh dearbhú déanta aige de réir Choinbhinsiún 2000 á rá nach gá faisnéis a sholáthar dó faoi thascarthaí de réir mar a shamhlaítear in Airteagal 20 den Choinbhinsiún sin.

27 .— (1) Tá feidhm ag an alt seo más rud é—

(a) go bhfuil an t-údarás inniúil i mballstát tar éis tascradh a údarú,

(b) go bhfuil seoladh teileachumarsáide an duine a shonraítear san údarú á úsáid i gcríoch an Stáit,

(c) nach gá cúnamh teicniúil a fháil ón Stát chun an tascradh a dhéanamh, agus

(d) go dtugann an t-údarás inniúil fógra don Aire dá réir sin de réir Airteagal 20 de Choinbhinsiún 2000.

(2) I gcás ina bhfuil feidhm ag an alt seo, leanfaidh an tAire ar aghaidh, gan mhoill agus ar a dhéanaí laistigh de thréimhse a shonraítear i bhfo-alt (7), de réir fho-alt (3) nó fho-ailt (4) agus (5), de réir mar is cuí.

(3) Dá dtabharfaí údarú faoi alt 2 d’Acht 1993 in imthosca den tsamhail chéanna, údaróidh an tAire go ndéanfar an tascradh nó go leanfar den tascradh.

(4) Más rud é—

(a) nach dtabharfaí údarú faoin alt sin 2,

(b) go bhfuil feidhm ag alt 3 , nó

(c) gur cion polaitiúil nó cion ioncaim an cion lena mbaineann,

éileoidh an tAire nach ndéanfar an tascradh nó go bhfoirceannfar an tascradh agus déanfaidh sé nó sí na cúiseanna lena éileamh amhlaidh a thabhairt i scríbhinn.

(5) I gcás ina bhfuil feidhm ag fo-alt (4), éileoidh an tAire nach bhféadfar aon ábhar a tascraíodh cheana fad a bhí an seoladh teileachumarsáide á úsáid sa Stát a úsáid nó nach bhféadfar an céanna a úsáid ach amháin faoi dhálaí sonraithe, agus déanfaidh an tAire an fírinniú ina leith sin a chur in iúl i scríbhinn don údarás inniúil.

(6) Féadfaidh an tAire a iarraidh ar an údarás inniúil achoimre ar fhíorais an cháis a sholáthar mar aon le haon fhaisnéis bhreise is gá chun a chumasú dó nó di cinneadh a dhéanamh i dtaobh an dtabharfaí údarú faoi alt 2 d’Acht 1993 in imthosca den tsamhail chéanna.

(7) Sonraítear an tréimhse seo a leanas chun críocha fho-alt (2):

(a) tréimhse nach faide ná 96 huaire an chloig; nó

(b) i gcás inar gá cinneadh a dhéanamh i dtaobh an dtabharfaí údarú faoi alt 2 d’Acht 1993 in imthosca den tsamhail chéanna, tréimhse nach faide ná 12 lá san iomlán.

(8) I gcás ina bhfuil feidhm ag mír (b) d'fho-alt (7), cuirfidh an tAire in iúl i scríbhinn don údarás inniúil na dálaí lena bhfírinnítear an iarraidh ar fhadú na tréimhse atá luaite i mír (a) den fho-alt sin.

(9) Maidir le faisnéis arna soláthar faoin alt seo ag an údarás inniúil, meastar gur faisnéis oifigiúil í chun críocha an Achta um Rúin Oifigiúla 1963.

Ilghnéitheach

28 .— (1) San alt seo, tá le “ gnóthas údaraithe ” an bhrí a thugtar dó le Rialacháin na gComhphobal Eorpach (Líonraí agus Seirbhísí Cumarsáide Leictreonaí) (Údarú) 2003 (I.R. Uimh. 306 de 2003), arna leasú le Rialacháin na gComhphobal Eorpach (Líonraí agus Seirbhísí Cumarsáide Leictreonaí) (Údarú)(Leasú) 2007 (I.R. Uimh. 372 de 2007).

(2) Más rud é—

(a) go bhfuil duine i láthair sa Stát,

(b) go mbeidh údarú tugtha faoi alt 2 d’Acht 1993 chun teachtaireachtaí teileachumarsáide chuig an duine nó ón duine a thascradh,

(c) nach féidir na teachtaireachtaí a thascradh go díreach, ach

(d) gur féidir le gnóthas údaraithe a fuair ordacháin faoi alt 110 d’Acht 1983 i ndáil le tascarthaí tascradh na dteachtaireachtaí a éascú trí rochtain a fháil ar threalamh tascartha i mballstát,

éascóidh an gnóthas údaraithe tascradh na dteachtaireachtaí sin trí rochtain a fháil ar an trealamh sin.

(3) Más rud é—

(a) go bhfuil duine i láthair i mballstát,

(b) go bhfuiltear tar éis ordú nó barántas dleathach chun teachtaireachtaí teileachumarsáide chuig an duine nó ón duine a thascradh a dhéanamh nó a eisiúint sa bhallstát chun críocha imscrúdaithe choiriúil agus go bhfuil an t-ordú nó an barántas sin i bhfeidhm,

(c) nach féidir na teachtaireachtaí a thascradh go díreach sa bhallstát, ach

(d) maidir le gnóthas údaraithe a bhfuil ordacháin faighte aige faoi alt 110 d’Acht 1983 i ndáil le tascarthaí—

(i) gur féidir leis na teachtaireachtaí a thascradh, agus

(ii) go bhfuil trealamh tascartha aige chun a chumasú do sholáthróir seirbhísí teileachumarsáide sa bhallstát iad a thascradh,

éascóidh an gnóthas údaraithe don soláthróir na teachtaireachtaí a thascradh.

29 .— Tá feidhm ag Acht 1993 agus tá éifeacht leis i ndáil leis an gCuid seo fairis na modhnuithe is gá, lena n-áirítear an méid seo a leanas:

(a) tá tagairtí in Acht 1993 do “an tAcht seo” le forléiriú mar thagairtí don Chuid seo;

(b) tá tagairtí san Acht sin d’údarú le forléiriú mar thagairtí—

(i) d’údarú a meastar ina leith faoi alt 25 (8) gur údarú é faoi alt 2 d’Acht 1993, nó

(ii) d’údarú faoi alt 27 (3),

de réir mar a bheidh;

(c) tá tagairtí san Acht sin do shárú ar fhoráil de chuid Acht 1993 le forléiriú mar thagairtí do shárú ar fhoráil de chuid na Coda seo;

(d) tá tagairtí san Acht sin do dhoiciméid oifigiúla le forléiriú mar thagairtí do dhoiciméid oifigiúla atá ar fáil don Aire i dtaca le hiarraidh faoin gCuid seo; agus

(e) tá tagairtí do dhuine in ailt 8(5) agus 9(11) d’Acht 1993 le forléiriú mar thagairtí do dhuine atá i láthair sa Stát.

30 .— Leasaítear alt 110 (cumhachtaí ginearálta an Aire i ndáil le seirbhísí poist agus teileachumarsáide) d’Acht 1983 trí na fo-ailt seo a leanas a chur leis:

“(6) Aon duine nach ndéanfaidh, gan leithscéal réasúnach, ordachán faoin alt seo a chomhlíonadh, beidh sé ciontach i gcion agus dlífear—

(a) ar é a chiontú go hachomair fíneáil nach mó ná €5,000 a chur air, nó

(b) ar é a chiontú ar díotáil, fíneáil a chur air.

(7) Déanfar imeachtaí i leith ciona faoi fho-alt (6), lena n-áirítear aon achomharc nó imeachtaí ina dhiaidh sin, a sheoladh i gcúirt iata.”.

CUID 4

Maoin a Chalcadh, a Choigistiú agus a Fhorghéilleadh

Caibidil 1

Léiriú

31 .— (1) Sa Chuid seo:

folaíonn “achomharc” aon imeachtaí chun breithiúnas a urscaoileadh nó a chur ar ceal agus aon iarratas ar thriail nua nó ar bhac ar fhorghníomhú;

ciallaíonn “deimhniú” an deimhniú—

(a) dá bhforáiltear in Airteagal 9 den Chreat-Chinneadh, agus

(b) a bhfuil an fhoirm chaighdeánach ina leith leagtha amach san Iarscríbhinn a ghabhann leis an gCinneadh;

tá le “ordú um chomhar coigistíochta” an bhrí a thugtar dó le halt 51;

ciallaíonn “ordú coigistíochta” ordú coigistíochta de réir bhrí Acht 1994;

ciallaíonn “cosantóir” an duine a mbaineann ordú calctha seachtrach nó ordú coigistíochta seachtrach lena mhaoin nó lena maoin;

ciallaíonn “ordú coigistíochta seachtrach” ordú arna dhéanamh ag cúirt i stát ainmnithe chun na gcríoch seo a leanas—

(a) maoin a ghnóthú sa Stát is maoin a glacadh nó a fuarthas de thoradh iompair nó i dtaca le hiompar ar chion indíotáilte é dá ndéanfaí sa Stát é,

(b) luach maoine den sórt sin a ghnóthú, nó

(c) buntáiste airgid arna ghlacadh nó arna fháil amhlaidh a bhaint de dhuine;

ciallaíonn “ordú forghéillte seachtrach” ordú chun maoin a fhorghéilleadh sa Stát is ordú arna dhéanamh ag cúirt i stát ainmnithe nó is ordú i dtaca le himeachtaí a éiríonn as iompar ar chion indíotáilte é dá ndéanfaí sa Stát é;

ciallaíonn “ordú calctha seachtrach” aon bheart—

(a) arna dhéanamh go sealadach ag údarás breithiúnach inniúil de chuid stáit ainmnithe in imeachtaí coiriúla chun díothú, claochlú, bogadh, aistriú, diúscairt nó úsáid maoine sonraithe a chosc sa Stát, ar maoin í a d’fhéadfadh a bheith ina hábhar do choigistiú nó ina fianaise sna himeachtaí seo, agus

(b) arna dhéanamh—

(i) chun an mhaoin a choigistiú dá éis sin, nó

(ii) chun fianaise a chosaint;

tá le “ordú um chomhar i dtaca le forghéilleadh” an bhrí a thugtar dó le halt 60;

tá le “ordú um chomhar i dtaca le calcadh” an bhrí a thugtar dó le halt 35;

ciallaíonn “ordú calctha”—

(a) ordú faoi alt 24 (arna leasú le halt 105(a) den Acht seo) d’Acht 1994,

(b) ordú faoi alt 14 nó 15 den Acht um Cheartas Coiriúil (Cionta Sceimhlitheoireachta) 2005, nó

(c) ordú faoi alt 32 ,

a bhaineann le maoin i stát ainmnithe nó a mhéid a bhaineann sé le maoin den sórt sin;

ciallaíonn “údarás breithiúnach eisiúna” údarás breithiúnach i stát ainmnithe, mar a mhínítear i ndlí an stáit sin, ar údarás é a dhéanann, a bhailíochtaíonn nó a dhaingníonn, ar aon slí, ordú calctha seachtrach;

ciallaíonn “stát eisiúna” an stát ainmnithe ina bhfeidhmíonn údarás breithiúnach eisiúna dlínse;

folaíonn “maoin” maoin d’aon tuairisc, ar maoin chorpraithe nó neamhchorpraithe, shochorraithe nó dhochorraithe é agus cibé áit a bhfuil sí, agus ar maoin í a measann an t-údarás breithiúnach inniúil sa stát ainmnithe ina leith—

(a) gur fáltais ó chion í,

(b) go bhfuil sí comhionann le luach iomlán na bhfáltas sin nó le cuid de luach na bhfáltas sin, nó

(c) gur ionstraimeachtaí nó cuspóirí ciona í,

agus folaíonn sé doiciméid lena bhfianaítear teideal chuig maoin nó leas i maoin;

ciallaíonn “maoin inréadaithe”—

(a) i ndáil le hordú um chomhar i dtaca le calcadh nó ordú um chomhar coigistíochta arna dhéanamh i leith maoine sonraithe, an mhaoin atá sonraithe san ordú, agus

(b) in aon chás eile—

(i) aon mhaoin a shealbhaíonn an cosantóir, agus

(ii) aon mhaoin a shealbhaíonn duine a bhfuil bronntanas tugtha go díreach nó go neamhdhíreach ag an gcosantóir dó nó di,

ach ní fholaíonn sé maoin is ábhar d’ordú arna dhéanamh ag cúirt in imeachtaí eile sa Stát mura rud é go n-urscaoiltear an t-ordú sin nó go dtí go n-urscaoiltear é.

(2) Chun críocha na Coda seo, folaíonn déileáil le maoin a shealbhaíonn aon duine (gan dochar do ghinearáltacht na habairte)—

(a) i gcás ina bhfuil fiach dlite don duine sin, íocaíocht a dhéanamh le haon duine mar shocraíocht nó mar laghdú ar an bhfiach, agus

(b) an mhaoin a thabhairt amach as an Stát.

(3) Aon tagairtí sa Chuid seo do bhronntanas, is tagairtí iad do bhronntanas ar bhronntanas é a thiocfadh faoi réim Acht 1994 dá mba ordú coigistíochta an t-ordú coigistíochta seachtrach, agus tá feidhm ag na forálacha den Acht sin a bhaineann le bronntanas a thagann faoi réim an Achta sin amhlaidh agus tá éifeacht leo i ndáil le bronntanas dá dtagraítear sa Chuid seo.

Caibidil 2

Maoin a chalcadh

32 .— (1) Tá feidhm ag an alt seo i gcás ina mbeifear tar éis imeachtaí coiriúla a thionscnamh, nó ina bhfuil imscrúdú coiriúil á dhéanamh, sa Stát.

(2) I gcás feidhm a bheith ag an alt seo, féadfaidh an Stiúrthóir Ionchúiseamh Poiblí nó comhalta den Gharda Síochána nach ísle céim ná cigire iarratas a dhéanamh ex parte, agus ar shlí seachas go poiblí, chuig breitheamh den Ard-Chúirt ar ordú (“ordú calctha”) á thoirmeasc ar aon duine maoin shonraithe a dhíothú, a chlaochlú, a bhogadh, a aistriú, a dhiúscairt nó a úsáid, cibé acu sa Stát nó lasmuigh de, ar maoin í a d’fhéadfadh a bheith ina fianaise sna himeachtaí sin nó, de réir mar a bheidh, in aon imeachtaí den sórt sin a thionscnófar.

(3) Féadfaidh an breitheamh an t-ordú a ndéantar iarratas ina leith a dhéanamh más deimhin leis nó léi—

(a) gur tionscnaíodh na himeachtaí coiriúla nó go bhfuil imscrúdú coiriúil á dhéanamh,

(b) maidir le fianaise i ndáil leis an gcion lena mbaineann—

(i) go bhfuil sí ar áitreabh sonraithe,

(ii) gur dóigh tábhacht shubstaintiúil a bheith aici (aisti féin nó in éineacht le fianaise eile) maidir leis na himeachtaí nó maidir leis an imscrúdú, agus

(iii) gur dóigh di a bheith inghlactha ag triail i leith an chiona,

agus

(c) i gcás ina bhfuil an fhianaise i stát ainmnithe, go ndearnadh iarraidh nó go ndéanfar iarraidh ar í a aistriú chuig Coimisinéir an Gharda Síochána.

(4) Níl feidhm ag ordú faoin alt seo maidir le haon doiciméid a thagann faoi réir pribhléide dlíthiúla.

(5) Féadfaidh an Ard-Chúirt ordú faoin alt seo a athrú nó a urscaoileadh ar iarratas a fháil—

(a) ó chomhalta den Gharda Síochána nach ísle céim ná cigire, nó

(b) ó aon duine dá ndéanann an t-ordú difear,

agus déanfaidh sí an t-ordú a urscaoileadh mura mbeadh sé ar mhaithe leis an gceartas dá leanfadh sé i bhfeidhm.

(6) Más rud é—

(a) go ndéantar ordú faoin alt seo a tharchur lena fhorfheidhmiú i stát ainmnithe de bhun alt 33 (4), agus

(b) go ndéantar an t-ordú a athrú nó a urscaoileadh ina dhiaidh sin i ndáil le maoin sa stát ainmnithe,

cuirfidh an Chúirt faoi deara go gcuirfear an t-athrú nó an t-urscaoileadh in iúl don Údarás Lárnach a luaithe is indéanta, agus déanfaidh an tÚdarás sin, air sin, fógra dá réir sin a thabhairt don údarás iomchuí sa stát ainmnithe.

33 .— (1) Más rud é—

(a) go bhfuil aon mhaoin lena mbaineann iarratas ar ordú calctha i mballstát, agus

(b) go ngéilltear don iarratas,

féadfaidh an t-iarratasóir a iarraidh ar an mbreitheamh lena mbaineann a chur faoi deara an deimhniú a chomhlánú.

(2) Maidir leis an deimhniú—

(a) beidh síniú air (a d’fhéadfadh a bheith ina shíniú leictreonach) ón gcúirt lena mbaineann nó thar a ceann, agus

(b) beidh ráiteas san áireamh ann i dtaobh chruinneas na faisnéise sa deimhniú.

(3) Más ordú faoi alt 32 chun fianaise a chosaint an t-ordú calctha, féadfaidh an chúirt lena mbaineann aon fhoirmiúlachtaí agus nósanna imeachta maidir le forfheidhmiú an ordaithe, ar foirmiúlachtaí iad is gá chun a chinntiú go bhfuil an fhianaise inghlactha in imeachtaí coiriúla, a chur in iúl don údarás breithiúnach.

(4) Déanfaidh cláraitheoir de chuid na Cúirte an t-ordú calctha agus an deimhniú a chur chuig an iarratasóir agus cuirfidh an t-iarratasóir chuig an Údarás Lárnach iad lena dtarchur chuig an údarás cuí sa bhallstát lena mbaineann d’fhonn an t-ordú calctha a chur á fhorfheidhmiú.

(5) Má bhaineann ordú calctha le maoin i stát ainmnithe (seachas ballstát), féadfaidh an Stiúrthóir Ionchúiseamh Poiblí na nithe seo a leanas a chur chuig an Údarás Lárnach lena dtarchur chuig an údarás cuí sa stát ainmnithe d’fhonn an t-ordú calctha a chur á fhorfheidhmiú—

(a) cóip den ordú arna fíordheimhniú go cuí, agus

(b) cibé faisnéis eile a éileoidh an t-údarás cuí de réir na hionstraime idirnáisiúnta iomchuí.

34 .— (1) Déanfar ordú calctha seachtrach ó bhallstát agus deimhniú arna chomhlánú go cuí agus arna dheimhniú mar ordú cruinn ag an údarás breithiúnach eisiúna, maille le hiarraidh nó le hordachán a bhaineann leis an tslí ina ndéileálfar leis an bhfianaise nó leis an maoin lena mbaineann, a tharchur, mura bhforáiltear a mhalairt le dearbhú ón Stát faoi Airteagal 4.2 den Chreat-Chinneadh, chuig an Údarás Lárnach i dtaca le hiarraidh chun an t-ordú a fhorfheidhmiú.

(2) Maidir le hiarraidh ó aon stát ainmnithe eile chun ordú calctha seachtrach a fhorfheidhmiú, beidh ag gabháil léi—

(a) cóip chuí-dheimhnithe den ordú,

(b) ráiteas ar na forais i leith na nithe seo a leanas—

(i) an t-ordú a dhéanamh, agus

(ii) a chreidiúint go mbeidh an fhianaise nó an mhaoin lena mbaineann faoi réir ordaithe coigistíochta,

agus aon fhaisnéis eile a éileofar leis an ionstraim idirnáisiúnta iomchuí.

(3) Déanfar na doiciméid a luaitear i bhfo-alt (1) nó (2) a tharchur ar aon mhodh ar féidir leis taifead scríofa a tháirgeadh faoi dhálaí trína ligtear don Údarás Lárnach nó don Ard-Chúirt fíre na ndoiciméad a shuíomh.

(4) Measfar fo-alt (3) a bheith arna chomhlíonadh ag údarás breithiúnach eisiúna má dhéantar cóipeanna macasamhla den ordú calctha seachtrach, den deimhniú (más cuí) agus d’aon aistriúchán orthu a tharchur i gcomhlíonadh aon rialachán a dhéantar faoi fho-alt (6).

(5) Más rud é nach deimhin leis an Údarás Lárnach nó leis an Ard-Chúirt go bhfuil cóip mhacasamhla de dhoiciméad arna tharchur de réir an ailt seo ag freagairt don doiciméad a n-airbheartaíonn sé ina leith gur cóip den sórt sin é, déanfaidh an tÚdarás Lárnach nó an Chúirt—

(a) a iarraidh ar an údarás breithiúnach eisiúna a chur faoi deara an doiciméad bunaidh nó cóip de a tharchur chuig an Údarás Lárnach, agus

(b) an modh ina bhfuil an doiciméad bunaidh nó cóip de le tarchur amhlaidh a chomhaontú leis an údarás breithiúnach sin.

(6) Féadfaidh an tAire, má mheasann sé nó sí gur gá déanamh amhlaidh chun cruinneas doiciméad arna dtarchur de réir an ailt seo a áirithiú, rialacháin a dhéanamh—

(a) lena bhforordófar nósanna imeachta atá le leanúint i dtaca le doiciméid a tharchur de réir an ailt seo, agus

(b) lena sonrófar gnéithe atá le bheith ann in aon trealamh a bheidh á úsáid chuige sin.

35 .— (1) Déanfaidh an tÚdarás Lárnach, tar éis ordú calctha seachtrach, deimhniú (más cuí), aon doiciméid tacaíochta nó doiciméid ghaolmhara eile agus aon aistriúchán a fháil, a chur faoi deara láithreach iarratas a dhéanamh chun na hArd-Chúirte ar ordú (dá ngairtear “ordú um chomhar i dtaca le calcadh”) chun aitheantas a thabhairt don ordú calctha seachtrach agus chun toirmeasc a chur ar aon duine déileáil leis an maoin a shonraítear san ordú calctha seachtrach.

(2) Féadfar an t-iarratas a dhéanamh ex parte, agus ar shlí seachas go poiblí, agus beidh na doiciméid atá luaite i bhfo-alt (1) nó cóipeanna díobh ag gabháil leis agus, i gcás stáit ainmnithe (seachas ballstát), déanfar é le toiliú an Aire.

(3) Maidir le hiarratas ó bhallstát ar ordú calctha seachtrach a fhorfheidhmiú, déileálfar leis a luaithe is féidir agus, aon uair is indéanta é, laistigh de 24 huaire an chloig tar éis an t-ordú agus deimhniú arna chomhlánú go cuí a fháil.

(4) Ar an iarratas a fháil faoin alt seo, féadfaidh an Chúirt, faoi réir fho-alt (5), ordú um chomhar i dtaca le calcadh a dhéanamh, ach sin faoi réir aon choinníollacha a shonrófar san ordú.

(5) Féadfaidh an Chúirt—

(a) diúltú ordú um chomhar i dtaca le calcadh a dhéanamh ar fhoras a luaitear in alt 3 nó 46, nó

(b) déanamh ordaithe den sórt sin a chur siar ar fhoras a luaitear in alt 47 .

(6) I gcás ina mbaineann iarraidh ó bhallstát le cion dá dtagraítear in Airteagal 3(2) den Chreat-Chinneadh ar cion é is inphionóis sa stát sin le téarma uasta príosúnachta nach giorra ná 3 bliana, ní fhéadfaidh an Chúirt diúltú ordú um chomhar i dtaca le calcadh a dhéanamh ar an aon fhoras amháin nach cion faoi dhlí an Stáit an t-iompar arb é an cion é.

(7) Más rud é—

(a) gur chun faisnéis a chosaint atá ordú calctha seachtrach,

(b) gur gá a chinntiú go bhfuil an fhianaise inghlactha sna himeachtaí lena mbaineann, agus

(c) chun na críche sin, go dtugann an t-údarás breithiúnach eisiúna léiriú sainráite ar fhoirmiúlachtaí agus nósanna imeachta áirithe maidir leis an ordú calctha seachtrach a fhorfheidhmiú,

déanfar foráil leis an ordú um chomhar i dtaca le calcadh maidir le hurramú na bhfoirmiúlachtaí agus na nósanna imeachta sin, mura rud é go mbeadh sé contrártha do phrionsabail bhunúsacha dhlí an Stáit na foirmiúlachtaí agus na nósanna imeachta sin a urramú.

(8) Cuirfidh an Chúirt faoi deara go ndéanfar fógra faoin ordú um chomhar i dtaca le calcadh a thabhairt d’aon duine ar dealraitheach go ndéanann an t-ordú difear dó nó di nó a ndéanann an t-ordú difear dó nó di mura rud é gur deimhin leis an gCúirt nach féidir le réasún a fháil amach cá bhfuil an duine.

36 .— (1) Féadfaidh feidhm a bheith ag ordú um chomhar i dtaca le calcadh—

(a) i gcás ina sonraítear maoin áirithe san ordú calctha seachtrach, maidir leis an maoin arna sonrú amhlaidh, agus

(b) in aon chás eile—

(i) maidir le maoin inréadaithe a shealbhaíonn duine sonraithe, cibé acu atá nó nach bhfuil an mhaoin arna tuairisciú san ordú um chomhar i dtaca le calcadh, agus

(ii) maidir le haon mhaoin inréadaithe a shealbhaíonn duine sonraithe, ar maoin í arna haistriú chuig an duine tar éis an t-ordú calctha seachtrach a dhéanamh.

(2) Maidir le hordú um chomhar i dtaca le calcadh, féadfar cibé foráil is cuí leis an gCúirt a dhéanamh leis maidir le caiteachais mhaireachtála agus caiteachais dhlíthiúla an duine a shealbhaíonn an mhaoin lena mbaineann.

(3) Féadfaidh an Chúirt—

(a) glacadóir a cheapadh aon tráth—

(i) chun seilbh a ghlacadh ar aon mhaoin inréadaithe lena mbaineann ordú um chomhar i dtaca le calcadh, agus

(ii) de réir ordacháin ón gCúirt, chun an mhaoin a bhainistiú nó chun déileáil léi ar shlí eile, ach sin faoi réir cibé eisceachtaí agus coinníollacha a shonróidh sí,

agus

(b) a cheangal ar aon duine a bhfuil an mhaoin ina sheilbh nó ina seilbh nó faoina urláimh nó faoina hurláimh seilbh na maoine a thabhairt suas don ghlacadóir.

(4) I gcás ina bhfuil ordú um chomhar i dtaca le calcadh déanta ag an gCúirt, féadfaidh comhalta den Gharda Síochána nó oifigeach custam agus máil aon mhaoin inréadaithe a urghabháil le nach ndéanfar an mhaoin a thabhairt amach as an Stát.

(5) Maidir le maoin a nglacfar seilbh uirthi faoi fho-alt (4), déileálfar léi de réir ordacháin na Cúirte.

37 .— (1) I gcás ina ndéantar ordú um chomhar i dtaca le calcadh i ndáil le talamh, nó ina ndéantar ordú lena n-athraítear nó lena n-urscaoiltear ordú den sórt sin, déanfaidh cláraitheoir na hArd-Chúirte fógra á rá go ndearnadh an t-ordú, mar aon le cóip den ordú, a chur chuig an Údarás Clárúcháin Maoine.

(2) Tar éis na doiciméid sin a fháil, déanfaidh an tÚdarás—

(a) más talamh chláraithe an talamh, a chur faoi deara go ndéanfar taifead sa chlár arna choimeád aige faoi na hAchtanna um Chlárú Gníomhas agus Teidil 1964 agus 2006 chun toirmeasc a chur, go dtí go n-urscaoiltear an t-ordú, ar aon déileáil leis an talamh agus ar aon mhuirear ar an talamh, agus

(b) má dhéantar an t-ordú a athrú nó a urscaoileadh ina dhiaidh sin, a chur faoi deara an taifead a athrú dá réir sin nó a chealú, de réir mar a bheidh.

(3) Mura bhfuil feidhm ag fo-alt (2)(a), cuirfidh an tÚdarás faoi deara go ndéanfar an fógra maidir le déanamh, athrú nó urscaoileadh an ordaithe um chomhar i dtaca le calcadh a chlárú i gclár na ngníomhas arna choimeád ag an Údarás faoi alt 35 den Acht um Chlárú Gníomhas agus Teidil 2006.

(4) I gcás ina ndéantar ordú um chomhar i dtaca le calcadh ar ordú é a dhéanann difear do leas i gcuideachta nó ina maoin, nó ina ndéantar ordú lena n-athraítear nó lena n-urscaoiltear ordú den sórt sin, déanfaidh cláraitheoir na hArd-Chúirte fógra, agus cóip den ordú, a chur chuig Cláraitheoir na gCuideachtaí á rá go ndearnadh an t-ordú.

(5) Tar éis na doiciméid sin a fháil cuirfidh Cláraitheoir na gCuideachtaí faoi deara, más cuideachta chláraithe an chuideachta, go dtaifeadfar an fógra i gClár na gCuideachtaí agus—

(a) más cuideachta láithreach an chuideachta de réir bhrí Achtanna na gCuideachtaí 1963 go 2006, cuirfidh sé nó sí cóip den fhógra chuig gach stiúrthóir de chuid na cuideachta agus chuig rúnaí na cuideachta ag oifig chláraithe na cuideachta, nó

(b) in aon chás eile, cuirfidh sé nó sí cóip den fhógra leis an bpost chuig an duine ar a bhfuil cónaí sa Stát agus atá údaraithe chun seirbheáil próise agus aon fhógraí a cheanglaítear a sheirbheáil uirthi a ghlacadh thar ceann na cuideachta lena mbaineann.

(6) San alt seo—

ciallaíonn “ Clár na gCuideachtaí ” Clár na gCuideachtaí arna choimeád faoi Achtanna na gCuideachtaí 1963 go 2006;

ciallaíonn “ cuideachta chláraithe ”—

(a) cuideachta arna foirmiú agus arna clárú faoi na hAchtanna sin, agus

(b) cuideachta láithreach de réir bhrí na nAchtanna sin, nó

(c) cuideachta arna clárú faoi Chuid XI d’Acht na gCuideachtaí 1963 nó faoi Rialacháin na gComhphobal Eorpach (Nochtadh ag Brainsí) 1993 (I.R. Uimh. 395 de 1993).

38 .— (1) Déanfar cumhachtaí na hArd-Chúirte faoi alt 36 nó cumhachtaí glacadóra arna cheapadh nó arna ceapadh faoin alt sin a fheidhmiú, faoi réir an ailt seo, d’fhonn maoin a chur ar fáil lena gnóthú ar maoin í a d’fhéadfadh teacht chun bheith inghnóthaithe faoi aon ordú um chomhar coigistíochta a dhéanfar i gcás an chosantóra.

(2) Déanfar na cumhachtaí a fheidhmiú d’fhonn a cheadú d’aon duine, seachas an cosantóir nó faighteoir bronntanais, luach aon mhaoine a shealbhaíonn an duine a áirithiú agus a ghnóthú.

(3) I gcás maoine inréadaithe a shealbhaíonn duine ar thug an cosantóir bronntanas dó nó di go díreach nó go neamhdhíreach, feidhmeofar na cumhachtaí d’fhonn luach an bhronntanais, gan dul thar luach an bhronntanais, de thuras na huaire a réadú.

(4) Le linn na cumhachtaí a fheidhmiú, ní chuirfear i gcuntas aon oibleagáidí de chuid an chosantóra nó de chuid faighteora aon bhronntanais atá ar neamhréir leis an oibleagáid chun aon ordú um chomhar coigistíochta a chomhlíonadh ar ordú é a dhéanfar i gcás an chosantóra.

39 .— Maidir le glacadóir arna cheapadh nó arna ceapadh faoi alt 36 a dhéanann aon ghníomh—

(a) i ndáil le maoin nach maoin inréadaithe, ar gníomh é a bheadh sé nó sí i dteideal a dhéanamh dá mba mhaoin den sórt sin í,

(b) á chreidiúint, agus forais réasúnacha aige nó aici chun a chreidiúint, go bhfuil sé nó sí i dteideal an gníomh sin a dhéanamh i ndáil leis an maoin sin,

níl sé nó sí faoi dhliteanas ag aon duine i leith aon chaillteanais nó damáiste a tharlaíonn de thoradh an ghnímh ach amháin a mhéid arb é a fhaillí nó a faillí is cúis leis an gcaillteanas nó leis an damáiste.

40 .— (1) I gcás ina ndéantar duine a shealbhaíonn maoin inréadaithe a bhreithniú ina fhéimheach nó ina féimheach—

(a) tá maoin atá, de thuras na huaire, ina hábhar d’ordú um chomhar i dtaca le calcadh arna dhéanamh roimh an ordú lena mbreithnítear an duine ina fhéimheach nó ina féimheach, agus

(b) tá aon fháltais ó mhaoin a réadaítear de bhua alt 36 , agus atá i lámha glacadóra de thuras na huaire,

eisiata ó mhaoin an fhéimhigh chun críocha an Achta Féimheachta 1988.

(2) I gcás duine a bheith breithnithe ina fhéimheach nó ina féimheach, ní dhéanfar cumhachtaí na hArd-Chúirte faoi alt 36 nó cumhachtaí glacadóra arna cheapadh nó arna ceapadh faoin alt sin a fheidhmiú i ndáil le maoin de chuid an fhéimhigh chun críocha Acht sin 1988.

(3) I gcás ina ndéantar duine a bhreithniú ina fhéimheach nó ina féimheach agus go mbeidh bronntanas tugtha go díreach nó go neamhdhíreach aige nó aici—

(a) maidir le haon chinneadh i dtaobh an bhfuil an bronntanas ar neamhní ní dhéanfar é faoi alt 57, 58 nó 59 d’Acht sin 1988 i leith an bronntanas a dhéanamh aon tráth atá maoin an duine dár tugadh an bronntanas ina hábhar d’ordú um chomhar i dtaca le calcadh, agus

(b) maidir le haon chinneadh i dtaobh é a bheith ar neamhní arna dhéanamh faoi aon cheann de na hailt sin tar éis urscaoileadh an ordaithe um chomhar i dtaca le calcadh, cuirfear i gcuntas ann aon réadú faoin Acht seo ar mhaoin a shealbhaíonn an duine dár tugadh an bronntanas.

(4) In aon chás inar tíolacadh achainí i bhféimheacht, nó ina ndearnadh breithniú i bhféimheacht, roimh an 1 Eanáir 1989, tá éifeacht leis an alt seo fairis an modhnú go ndéanfar tagairtí do mhaoin an fhéimhigh atá dílsithe do na sannaithe chun críocha an dlí féimheachta a bhí ar marthain roimh an dáta sin a chur in ionad tagairtí do mhaoin an fhéimhigh chun críocha Acht sin 1988.

41 .— (1) Gan dochar do ghinearáltacht aon fhorála de chuid aon achtacháin eile, más rud é—

(a) go ndéanann an Sannaí Oifigiúil nó iontaobhaí arna cheapadh nó arna ceapadh faoi Chuid V den Acht Féimheachta 1988 aon mhaoin a urghabháil nó a dhiúscairt ar maoin í nach bhfuil a fheidhmeanna nó a feidhmeanna infheidhmithe i ndáil léi mar go bhfuil sí, de thuras na huaire, ina hábhar d’ordú um chomhar i dtaca le calcadh, agus

(b) go gcreideann sé nó sí, tráth na hurghabhála nó na diúscartha, agus forais réasúnacha aige nó aici chun a chreidiúint an tráth sin, go bhfuil sé nó sí i dteideal (cibé acu faoi ordú ón gcúirt nó ar shlí eile) an mhaoin a urghabháil nó a dhiúscairt,

níl sé nó sí faoi dhliteanas d’aon duine i leith aon chaillteanais nó damáiste a tharlaíonn de thoradh na hurghabhála nó na diúscartha ach amháin a mhéid arb é a fhaillí nó a faillí le linn gníomhú amhlaidh is cúis leis an gcaillteanas nó leis an damáiste, agus tá lian aige nó aici ar an maoin, nó ar na fáltais ó dhíol na maoine, i leith cibé cuid dá chaiteachais nó dá caiteachais a tabhaíodh i dtaca leis an bhféimheacht nó leis na himeachtaí eile ar i ndáil léi nó leo a airbheartaíodh gur tharla an urghabháil nó an diúscairt agus i leith cibé méid dá luach saothair a fhéadfar a shannadh le réasún i leith é nó í do ghníomhú i dtaca leis na himeachtaí sin.

(2) I gcás ina ndéanfaidh an Sannaí Oifigiúil nó iontaobhaí arna cheapadh nó arna ceapadh mar a dúradh caiteachais a thabhú i leith na maoine sin atá luaite i bhfo-alt (1)(a) agus, le linn déanamh amhlaidh, nach eol dó nó di agus nach bhfuil aon fhorais réasúnacha aige nó aici chun a chreidiúint go bhfuil an mhaoin faoi réir ordaithe um chomhar i dtaca le calcadh, beidh sé nó sí i dteideal (cibé acu a bheidh nó nach mbeidh an mhaoin sin urghafa nó diúscartha aige nó aici ionas go bhfuil lian aige nó aici) go n-íocfar na caiteachais sin leis nó léi faoi alt 42 .

42 .— (1) A mhéid is gá, féadfar airgead a íoctar nó a ghnóthaítear i leith ordaithe um chomhar i dtaca le calcadh (lena n-áirítear aon athrú ar ordú den sórt sin) a úsáid chun íoc as caiteachais arna dtabhú le linn cumhachtaí faoin Acht seo a fheidhmiú agus chun íoc as luach saothair aon duine a fhostaítear chun na críche sin.

(2) Maidir le hairgead a íoctar nó a ghnóthaítear i leith ordaithe um chomhar i dtaca le calcadh, tar éis aon chaiteachais nó luach saothair a íoc de réir fho-alt (1)—

(a) déanfar é a úsáid i gcomhair shásamh an ordaithe, agus

(b) faoi réir aon fhorála dá mhalairt san ionstraim idirnáisiúnta iomchuí, déanfar é a íoc isteach sa Státchiste nó diúscrófar é chun tairbhe don Státchiste de réir ordacháin an Aire Airgeadais mura rud é, ar iarraidh ón stát ainmnithe lena mbaineann nó thar ceann an stáit sin, go bhforálann an Chúirt a mhalairt.

43 .— (1) I gcás ina sealbhaíonn cuideachta maoin inréadaithe agus ina ndearnadh ordú chun í a fhoirceannadh nó inar rith sí rún chun í a fhoirceannadh go toilteanach, níl feidhmeanna an leachtaitheora (nó feidhmeanna aon leachtaitheora shealadaigh) infheidhmithe i ndáil leis an méid seo a leanas—

(a) maoin atá, de thuras na huaire, faoi réir ordaithe um chomhar i dtaca le calcadh arna dhéanamh roimh an tráth iomchuí, agus

(b) aon fháltais ó mhaoin arna réadú de bhua alt 36 ar fáltais iad atá, de thuras na huaire, i lámha an ghlacadóra.

(2) I gcás ordú den sórt sin a bheith déanta nó rún den sórt sin a bheith rite, ní dhéanfar na cumhachtaí a thugtar don Ard-Chúirt le halt 36 nó don ghlacadóir arna cheapadh nó arna ceapadh faoin alt sin a fheidhmiú i ndáil le haon mhaoin inréadaithe a shealbhaíonn an chuideachta ar i ndáil léi atá feidhmeanna an leachtaitheora infheidhmithe—

(a) ionas go gcuirtear toirmeasc air nó uirthi na feidhmeanna sin a fheidhmiú chun aon mhaoin a shealbhaíonn an chuideachta a dháileadh ar chreidiúnaithe na cuideachta, nó

(b) ionas go gcoisctear caiteachais (lena n-áirítear luach saothair an leachtaitheora nó aon leachtaitheora shealadaigh) a íoc as aon mhaoin, ar caiteachais iad a tabhaíodh go cuí le linn foirceannadh a dhéanamh i leith na maoine.

(3) San alt seo—

ciallaíonn “ cuideachta ” aon chuideachta a fhéadfar a fhoirceannadh faoi Achtanna na gCuideachtaí 1963 go 2006;

ciallaíonn “ tráth iomchuí ”—

(a) i gcás nach mbeidh aon ordú déanta chun an chuideachta a fhoirceannadh, tráth rite an rúin chun í a fhoirceannadh go toilteanach,

(b) i gcás ina mbeidh ordú den sórt sin déanta agus, sula ndéantar an achainí chun an chuideachta a chur á foirceannadh ag an gcúirt a thíolacadh, go mbeidh rún den sórt sin rite ag an gcuideachta, tráth rite an rúin, agus

(c) in aon chás eile ina mbeidh ordú den sórt sin déanta, tráth déanta an ordaithe.

44 .— Fanann ordú um chomhar i dtaca le calcadh i bhfeidhm—

(a) i gcás inarb é is cuspóir don ordú calctha seachtrach ná fianaise a áirithiú, go dtí go n-aistrítear an fhianaise chuig an stát eisiúna nó go dtí go ndiúltaítear d’iarraidh ar aistriú den sórt sin,

(b) i gcás inarb é is cuspóir don ordú ná maoin a choigistiú ina dhiaidh sin, go dtí go ndéantar ordú um chomhar coigistíochta nó go dtí go ndiúltaítear don iarraidh ar ordú den sórt sin agus go seastar leis an diúltú tar éis aon achomharc a dhéanamh ina choinne, nó

(c) go dtí go ndéantar an t-ordú um chomhar i dtaca le calcadh a urscaoileadh de réir alt 45 .

45 .— (1) Faoi réir fhorálacha an ailt seo, tar éis d’aon duine dá ndéanann ordú um chomhar i dtaca le calcadh difear iarratas a dhéanamh—

(a) féadfaidh an Ard-Chúirt an t-ordú a athrú nó a urscaoileadh, agus

(b) urscaoilfidh an Ard-Chúirt an t-ordú—

(i) más rud é nach dtionscnaítear imeachtaí i leith an chiona, nó nach ndéantar iarratas ar an bhfianaise a aistriú nó ar ordú coigistíochta a dhéanamh, laistigh de cibé tréimhse ama a mheasann an chúirt a bheith réasúnach, nó

(ii) má mheasann an chúirt ar aon chúis eile nár ar mhaithe leis an gceartas é an t-ordú do leanúint i bhfeidhm.

(2) Déanfaidh an t-iarratasóir fógra faoi iarratas faoin alt seo agus faoi na forais leis an bhfógra a thabhairt, i cibé slí a fhorordaítear le rialacha cúirte nó de réir mar a ordóidh an Chúirt, don Údarás Lárnach lena dtarchur chuig an údarás eisiúna.

(3) Ní ghabhann éifeacht fionraíochta le déanamh iarratais faoin alt seo.

(4) Ní fhéadfaidh ach údarás breithiúnach sa stát eisiúna lena mbaineann athbhréithniú a dhéanamh ar na forais shubstainteacha a ghabhann le hordú calctha seachtrach a dhéanamh.

(5) Déanfaidh cláraitheoir na Cúirte toradh an iarratais a chur in iúl don údarás breithiúnach eisiúna.

46 .— (1) Gan dochar d'alt 3, ní fhéadfaidh an Ard-Chúirt diúltú ordú um chomhar i dtaca le calcadh a dhéanamh ach amháin más rud é—

(a) nach cion é lena mbaineann an ionstraim idirnáisiúnta iomchuí an cion lena mbaineann an t-ordú calctha seachtrach,

(b) i gcás ina ndearnadh an t-ordú calctha seachtrach i mballstát, nach dtugtar an deimhniú ar aird, go bhfuil sé neamhiomlán nó gur follasach nach gcomhfhreagraíonn sé don ordú calctha seachtrach,

(c) go bhfuil díolúine nó pribhléid ann faoi dhlí an Stáit a fhágann go bhfuil sé dodhéanta ordú um chomhar i dtaca le calcadh a dhéanamh,

(d) go bhfuil sé soiléir láithreach de réir na faisnéise a sholáthraítear i ndeimhniú gurbh ionann comhlíonadh iarrata ar fhianaise a aistriú nó ar mhaoin a choigistiú i ndáil leis gcion ar ina leith a rinneadh an t-ordú calctha seachtrach agus sárú ar an prionsabal ne bis in idem, nó

(e) i gcás ordaithe calctha sheachtraigh ó stát ainmnithe (seachas ballstát), nach bhfuil bonn réasúnach ann chun a chreidiúint—

(i) go bhfuil forais dhóthanacha ann leis an ordú a dhéanamh, nó

(ii) go mbeidh an mhaoin faoi réir ordaithe coigistíochta sheachtraigh.

(2) I gcás dá dtagraítear i bhfo-alt (1)(b), féadfaidh an Ard-Chúirt—

(a) spriocam a shonrú le deimhniú a thíolacadh nó le deimhniú a chomhlánú nó a cheartú,

(b) glacadh le doiciméad coibhéiseach, nó

(c) má mheasann an Chúirt go bhfuil an fhaisnéis a sholáthrófar dóthanach, an ceanglas maidir le tabhairt ar aird an deimhnithe a ligean thar ceal.

(3) Más rud é—

(a) go ndiúltaíonn an Ard-Chúirt ordú um chomhar i dtaca le calcadh a dhéanamh, nó

(b) d’ainneoin dul i gcomhairle leis an údarás breithiúnach eisiúna lena mbaineann, nach féidir ordú den sórt sin a dhéanamh—

(i) mar go ndeachaigh an fhianaise nó an mhaoin ar iarraidh, gur díothaíodh í nó nach féidir teacht uirthi sa suíomh a thaispeántar sa deimhniú, nó

(ii) nár cuireadh a suíomh in iúl ar mhodh sách cruinn,

ordóidh an Chúirt don Údarás Lárnach an méid sin a chur in iúl don údarás breithiúnach ar aon mhodh lenar féidir taifead i scríbhinn a tháirgeadh.

47 .— (1) Féadfaidh an Ard-Chúirt déanamh ordaithe um chomhar i dtaca le calcadh a iarchur—

(a) i gcás ina bhféadfadh déanamh an ordaithe dochar a dhéanamh d’imscrúdú coiriúil atá ar siúl sa Stát, go dtí cibé tráth is réasúnach leis an gCúirt,

(b) i gcás ina bhfuil an mhaoin nó an fhianaise lena mbaineann faoi réir ordaithe calctha cheana féin in imeachtaí coiriúla sa Stát, go dtí go n-urscaoiltear an t-ordú sin, nó

(c) faoi réir fho-alt (2), más rud é, i gcás ordaithe calctha sheachtraigh lena gcalctar maoin d’fhonn í a choigistiú dá éis sin, go mbeidh an mhaoin faoi réir ordaithe cheana féin arna dhéanamh in imeachtaí eile sa Stát, go dtí go n-urscaoiltear an t-ordú sin.

(2) Níl feidhm ag fo-alt (1)(c) ach amháin i gcás ina mbeadh tosaíocht ag an ordú arna dhéanamh sna himeachtaí eile sin ar ordú calctha ina dhiaidh sin in imeachtaí coiriúla.

(3) I gcás ina scoireann an foras leis an iarchur de bheith ann, déanfaidh an Chúirt ordú um chomhar i dtaca le calcadh láithreach.

(4) Ordóidh an Chúirt don Údarás Lárnach fógra i dtaobh na nithe seo a leanas a thabhairt don údarás breithiúnach eisiúna ar aon mhodh lenar féidir taifead i scríbhinn a thabhairt ar aird—

(a) aon iarchur arna dhéanamh faoin alt seo ar ordú um chomhar i dtaca le calcadh, na cúiseanna leis an iarchur agus an fad a mheastar a mhairfidh sé,

(b) ordú um chomhar i dtaca le calcadh a dhéanamh faoi fho-alt (3), agus

(c) aon bheart sriantach eile a bhféadfadh an mhaoin lena mbaineann a bheith faoina réir.

48 .— (1) Maidir le hiarraidh ar fhianaise atá faoi réir ordaithe um chomhar i dtaca le calcadh a aistriú chuig an stát eisiúna, déileálfar léi amhail is dá mba iarraidh ar chúnamh í i ndáil le hábhar fianaiseach a fháil faoi alt 75 .

(2) Maidir le hiarraidh ar ordú um chomhar coigistíochta a dhéanamh i ndáil le maoin atá faoi réir ordaithe den sórt sin, déileálfar léi de réir Chuid 5.

(3) D’ainneoin fho-alt (1), más rud é—

(a) go mbaineann iarraidh ó bhallstát le cion lena mbaineann Airteagal 3(2) den Chreat-Chinneadh, agus

(b) gur cion é atá inphionóis sa stát eisiúna le téarma príosúnachta nach giorra ná 3 bliana,

ní fhéadfaidh an Ard-Chúirt diúltú iarraidh ar fhianaise a aistriú chuig an stát sin ar an bhforas nach cion faoi dhlí an Stáit an t-iompar arb é an cion é.

Caibidil 3

Maoin a Choigistiú

49 .— (1) Má bhaineann ordú coigistíochta le maoin i stát ainmnithe, déanfaidh cláraitheoir nó cléireach na cúirte lena mbaineann, ar iarraidh a fháil agus faoi réir aon choinníollacha a shonraítear i rialacha cúirte, an méid seo a leanas a thabhairt don Stiúrthóir Ionchúiseamh Poiblí—

(a) cóip den ordú arna fíordheimhniú go cuí, agus

(b) deimhniú arna shíniú ag an gcláraitheoir nó ag an gcléireach á rá go bhfuil an t-am forordaithe chun achomharc a thaisceadh imithe in éag nó, de réir mar a bheidh, go rachaidh sé in éag ar dháta sonraithe.

(2) I gcás nach mbeidh ordú coigistíochta den sórt sin arna shásamh, féadfaidh an Stiúrthóir Ionchúiseamh Poiblí na nithe seo a leanas a chur chuig an Údarás Lárnach lena dtarchur chuig an údarás inniúil sa stát ainmnithe lena mbaineann—

(a) na doiciméid a luaitear i bhfo-alt (1),

(b) doiciméad arna shíniú ag an Stiúrthóir nó thar a cheann nó thar a ceann á rá—

(i) go bhfuil an t-ordú i bhfeidhm agus nár sásaíodh é, agus

(ii) gur láithrigh an cosantóir nó go raibh ionadaíocht aige nó aici ag na himeachtaí ina ndearnadh an t-ordú nó, murab amhlaidh an cás, cén dáta a thosaigh imeachtaí na cúirte agus cén dáta a fuair an cosantóir fógra ina dtaobh,

(c) tuairisc ghearr ar an iompar ba chúis leis an ordú a dhéanamh, agus

(d) iarraidh go ndéanfar an mhaoin lena mbaineann a réadú agus na fáltais a chur chun feidhme de réir dhlíthe an stáit sin.

(3) Más rud é—

(a) go réadaítear maoin de bhun iarrata den sórt sin, agus

(b) go bhfuil an méid a réadaítear níos lú ná an méid a ordaíodh a íoc faoin ordú coigistíochta nó go bhfuil sé comhionann leis an méid sin,

meastar an méid a ordaíodh amhlaidh a bheith arna laghdú de mhéid atá comhionann leis na fáltais ón réadú nó, de réir mar a bheidh, meastar an t-ordú coigistíochta a bheith arna urscaoileadh.

(4) In aon imeachtaí, aon deimhniú a airbheartaíonn a bheith arna eisiúint ag údarás inniúil sa stát ainmnithe agus ina luaitear—

(a) gur réadaíodh maoin de bhun na hiarrata,

(b) dáta an réadaithe, agus

(c) na fáltais ón réadú,

tá sé inghlactha, gan a thuilleadh cruthúnais, mar fhianaise ar na nithe sin.

(5) Má luaitear na fáltais ón réadú sa deimhniú ar shlí seachas san euro, measfar gurb ionann iad agus a gcoibhéis san euro arna ríomh de réir an ráta malairte bonnlíne a bhí i réim ar dháta an réadaithe.

50 .— (1) Féadfaidh an chúirt a rinne ordú coigistíochta seachtrach é a tharchur chuig an Údarás Lárnach, nó féadfar é a tharchur chuig an Údarás Lárnach thar ceann na cúirte sin, in éineacht le hiarraidh chun é a fhorfheidhmiú.

(2) Beidh na nithe seo a leanas ag gabháil le hordú coigistíochta seachtrach—

(a) cóip chuí-dheimhnithe den ordú,

(b) ráiteas ón gcúirt, nó thar ceann na cúirte, a rinne ant-ordú, á rá—

(i) go bhfuil an t-ordú i bhfeidhm agus nach bhfuil sé ina ábhar d’achomharc, agus

(ii) más rud é nár láithrigh an duine ar ina choinne nó ina coinne a rinneadh é sna himeachtaí lena mbaineann, go bhfuair an duine fógra i dtaobh na n-imeachtaí luath go leor le go bhféadfadh sé nó sí cosaint a dhéanamh sna himeachtaí,

(c) tuairisc ghearr ar an iompar arb é an cion é ba chúis leis an ordú a dhéanamh, agus

(d) aon aistriúcháin atá ag teastáil,

agus beidh aon fhaisnéis bhreise ann a éilítear leis an ionstraim idirnáisiúnta iomchuí.

51 .— (1) Féadfaidh an tÚdarás Lárnach, tar éis ordú coigistíochta seachtrach agus doiciméid a ghabhann leis a fháil, a chur faoi deara iarratas a dhéanamh chun na hArd-Chúirte ar ordú (“ordú um chomhar coigistíochta”) chun an mhaoin sa Stát lena mbaineann an t-ordú coigistíochta seachtrach a choigistiú.

(2) Beidh an iarraidh, na doiciméid a ghabhann léi agus aon doiciméid ghaolmhara eile, nó cóipeanna díobh, ag gabháil leis an iarratas.

(3) Tar éis an t-iarratas a fháil, féadfaidh an Chúirt, faoi réir fho-alt (4), ordú um chomhar coigistíochta a dhéanamh.

(4) Ní fhéadfaidh an Chúirt ordú um chomhar coigistíochta a dhéanamh mura rud é—

(a) go bhfuil sí sásta—

(i) go bhfuil an t-iarratas á dhéanamh le toiliú an Aire, agus

(ii) maidir leis na nithe a luaitear in alt 50 (2)(b),

(iii) gur iompar coiriúil an t-iompar ba chúis leis an ordú coigistíochta seachtrach a dhéanamh, agus

(iv) go bhfuil déanamh an ordaithe, thairis sin, de réir na hionstraime idirnáisiúnta iomchuí,

agus

(b) gur tugadh deis d’aon duine a éilíonn gur leis nó léi an mhaoin, nó go bhfuil leas aige nó aici sa mhaoin, is ábhar don ordú coigistíochta seachtrach, chun cúis a shuíomh le nach ceart an t-ordú a dhéanamh.

(5) Maidir leis an gCúirt—

(a) féadfaidh sí ordú um chomhar coigistíochta a athrú nó a urscaoileadh ar iarratas ó aon duine a éilíonn go bhfuil leas aige nó aici sa mhaoin lena mbaineann nó go ndéanann an t-ordú difear dó nó di ar shlí eile agus féadfaidh sí, i dtaca leis sin de, dul i gcomhairle leis an gcúirt a rinne an t-ordú coigistíochta seachtrach, agus

(b) déanfaidh sí—

(i) ordú um chomhar coigistíochta a athrú de réir aon athraithe arna dhéanamh san ordú coigistíochta seachtrach, agus

(ii) más deimhin léi go ndearnadh an t-ordú coigistíochta seachtrach a chúlghairm nó gur sásaíodh é de réir dlí an stáit ainmnithe lena mbaineann, é a urscaoileadh.

52 .— (1) I gcás ina ndéanfaidh an Ard-Chúirt ordú um chomhar coigistíochta chun suim airgid a íoc, féadfaidh an Stiúrthóir Ionchúiseamh Poiblí, gan dochar d’ alt 38 á chumasú maoin an chosantóra atá i lámha glacadóra arna cheapadh nó arna ceapadh faoin Acht seo a chur chun feidhme chun an t-ordú a shásamh, an t-ordú a fhorfheidhmiú aon tráth tar éis a dhéanta (nó, má dhéantar socrú leis an ordú go ndéanfar íocaíocht tráth is déanaí, ansin aon tráth tar éis an trátha is déanaí) amhail is dá mba bhreithiúnas ón gCúirt é chun an tsuim a shonraítear san ordú, nó aon suim is lú ná sin atá dlite fós faoin ordú, a íoc leis an Stát.

(2) Ní chumasaítear le haon ní i bhfo-alt (1) duine a phríosúnú.

(3) Faoi réir fho-ailt (4) agus (5), más rud é, aon tráth tar éis suim a íoc atá dlite faoi ordú um chomhar coigistíochta teacht chun bheith infhorfheidhmithe sa tslí dá bhforáiltear le fo-alt (1), go dtuairiscíonn an Stiúrthóir Ionchúiseamh Poiblí don Ard-Chúirt go bhfuil aon suim den sórt sin nó aon chuid di gan íoc fós, féadfaidh an Chúirt, gan dochar do bhailíocht aon ní a rinneadh roimhe sin faoin ordú nó don chumhacht chun an t-ordú a fhorfheidhmiú dá éis sin de réir fho-alt (1), a ordú go ndéanfar an cosantóir a phríosúnú ar feadh tréimhse nach faide ná an tréimhse atá leagtha amach sa dara colún den tábla a ghabhann leis an alt seo os coinne an méid atá gan íoc fós faoin ordú um chomhar coigistíochta de réir mar atá leagtha amach sa chéad cholún den tábla sin.

(4) Ní dhéanfar ordú faoi fho-alt (3) mura rud é—

(a) gur tugadh deis réasúnach don chosantóir aon uiríll a dhéanamh chun na Cúirte, agus

(b) go mbeidh an Chúirt tar éis na huiríll sin agus aon uiríll arna ndéanamh mar fhreagra orthu ag an Stiúrthóir Ionchúiseamh Poiblí a chur i gcuntas.

(5) Ní dhéanfar cosantóir a phríosúnú mar gheall ar neamhchomhlíonadh ordaithe um chomhar coigistíochta má shonraítear amhlaidh san iarraidh ar fhorfheidhmiú an ordaithe coigistíochta sheachtraigh agus má fhoráiltear amhlaidh leis an ionstraim idirnáisiúnta iomchuí.

(6) Déanfar aon téarma príosúnachta a fhorchuirtear faoi fho-alt (3) den alt seo a laghdú i gcomhréir le haon suim nó suimeanna a íoctar nó a ghnóthaítear ó am go ham faoin ordú um chomhar coigistíochta.

AN TÁBLA

53 .— (1) Más rud é—

(a) nach bhfuil ordú um chomhar coigistíochta chun suim airgid a íoc arna shásamh, nó

(b) gur chun maoin seachas suim den sórt sin a choigistiú atá ordú den sórt sin,

féadfaidh an Ard-Chúirt, ar iarratas ón Stiúrthóir Ionchúiseamh Poiblí, duine a cheapadh mar ghlacadóir i leith maoine inréadaithe.

(2) Féadfaidh an Chúirt cumhacht a thabhairt don ghlacadóir chun seilbh a ghlacadh ar aon mhaoin inréadaithe ach sin faoi réir cibé coinníollacha nó eisceachtaí a shonróidh an Chúirt.

(3) Féadfaidh an Chúirt a ordú d’aon duine a bhfuil aon mhaoin inréadaithe ina sheilbh nó ina seilbh nó ar a urláimh nó ar a hurláimh seilbh uirthi a thabhairt suas don ghlacadóir.

(4) Féadfaidh an Chúirt cumhacht a thabhairt don ghlacadóir aon mhaoin inréadaithe a réadú i cibé slí a ordóidh an Chúirt.

(5) Féadfaidh an Chúirt a ordú d’aon duine a shealbhaíonn leas i maoin inréadaithe cibé íocaíocht a ordóidh an Chúirt a dhéanamh leis an nglacadóir i leith aon leasa thairbhiúil a shealbhaíonn an cosantóir nó faighteoir aon bhronntanais a thagann faoi réim an Achta seo agus féadfaidh an Chúirt, le hordú, tar éis an íocaíocht a dhéanamh, aon leas sa mhaoin a aistriú, a dheonú nó a mhúchadh.

(6) Ní dhéanfaidh an Chúirt, i leith aon mhaoine, na cumhachtaí a thugtar leis an alt seo a fheidhmiú mura rud é gur tugadh deis réasúnach do na daoine a shealbhaíonn aon leas sa mhaoin uiríll a dhéanamh chuici.

54 .— (1) Faoi réir fho-alt (2), más rud é nach ndéantar aon suim a cheanglaítear ar dhuine a íoc faoi ordú um chomhar coigistíochta a íoc nuair a cheanglaítear í a íoc (cibé acu ar an ordú a dhéanamh nó tráth níos déanaí ná sin arna shonrú ag an gCúirt), dlífear den duine ús a íoc ar an tsuim don tréimhse ar lena linn a fhanann an tsuim gan íoc agus déileálfar le méid an úis, chun críocha forfheidhmithe, mar chuid den mhéid atá le gnóthú ón duine faoin ordú.

(2) Tabharfar neamhaird ar an méid úis is iníoctha faoi fho-alt (1) nuair a bheidh an téarma príosúnachta a bheidh le forchur faoi alt 52 á ríomh.

(3) Is é an ráta úis is iníoctha faoi fho-alt (1) an ráta a bhfuil feidhm aige de thuras na huaire i ndáil le fiach breithiúnais shibhialta de chuid na hArd-Chúirte.

55 .— (1) I gcás suim airgid is iníoctha, nó atá gan íoc fós, faoi ordú coigistíochta seachtrach a bheith arna sloinneadh in airgeadra seachas an euro, ceanglófar leis an ordú um chomhar coigistíochta go ndéanfar méid coibhéiseach san euro a íoc, arna ríomh de réir an ráta malairte bonnlíne a bhí i réim idir an t-airgeadra sin agus an euro ar an dáta a rinneadh an t-ordú um chomhar coigistíochta.

(2) Chun críocha fho-alt (1), tá deimhniú—

(a) a airbheartaíonn a bheith arna shíniú ag oifigeach de chuid forais airgeadais (de réir bhrí Chuid 2) sa Stát, agus

(b) ina luaitear an ráta malairte bonnlíne a bhí i réim idir airgeadra sonraithe agus an euro ar dháta sonraithe,

inghlactha, gan a thuilleadh cruthúnais, mar fhianaise ar an ráta malairte a bhí i réim amhlaidh ar an dáta sin.

56 .— (1) Déanfar cumhachtaí na hArd-Chúirte faoi alt 53 nó cumhachtaí glacadóra arna cheapadh nó arna ceapadh faoin alt sin a fheidhmiú, faoi réir an ailt seo, d’fhonn maoin a ghnóthú ar maoin í atá inghnóthaithe faoin ordú um chomhar coigistíochta lena mbaineann.

(2) Déanfar na cumhachtaí a fheidhmiú d’fhonn a cheadú d’aon duine, seachas an cosantóir nó faighteoir bronntanais, luach aon mhaoine a shealbhaíonn an duine a áirithiú agus a ghnóthú.

(3) I gcás maoine inréadaithe a shealbhaíonn duine ar thug an cosantóir bronntanas dó nó di go díreach nó go neamhdhíreach, feidhmeofar na cumhachtaí d’fhonn luach an bhronntanais, gan dul thar luach an bhronntanais, de thuras na huaire a réadú.

(4) Le linn na cumhachtaí a fheidhmiú, ní chuirfear i gcuntas aon oibleagáidí de chuid an chosantóra nó de chuid faighteora aon bhronntanais atá ar neamhréir leis an oibleagáid chun aon ordú um chomhar coigistíochta a chomhlíonadh.

57 .— Tá feidhm ag ailt 39, 40, 41, 42 agus 43 maidir le horduithe um chomhar coigistíochta mar atá feidhm acu maidir le horduithe um chomhar i dtaca le calcadh, agus dá réir sin—

(a) déanfar tagairtí d’alt 36 in ailt 39, 40 agus 43 a fhorléiriú mar thagairtí d’alt 53, agus

(b) déanfar tagairtí in ailt 40, 41, 42 agus 43 d’ordú um chomhar i dtaca le calcadh a fhorléiriú mar thagairtí d’ordú um chomhar coigistíochta.

Caibidil 4

Maoin a Fhorghéilleadh

58 .— (1) Más rud é go mbaineann ordú cúirte le maoin a fhorghéilleadh i stát ainmnithe, déanfaidh cláraitheoir nó cléireach na cúirte lena mbaineann, ar iarratas a fháil chuige sin agus faoi réir aon choinníollacha a shonrófar le rialacha cúirte, na nithe seo a leanas a thabhairt don Stiúrthóir Ionchúiseamh Poiblí—

(a) cóip chuí-fhíordheimhnithe den ordú, agus

(b) deimhniú arna shíniú ag an gcláraitheoir nó ag an gcléireach á rá go bhfuil an t-am forordaithe maidir le hachomharc a thaisceadh imithe in éag nó, de réir mar a bheidh go rachaidh é in éag ar dháta sonraithe.

(2) Féadfaidh an Stiúrthóir Ionchúiseamh Poiblí na nithe seo a leanas a tharchur chuig an Údarás Lárnach lena dtarchur chuig an údarás cuí sa stát ainmnithe lena mbaineann—

(a) na doiciméid atá luaite i bhfo-alt (1),

(b) doiciméad arna shíniú ag an Stiúrthóir Ionchúiseamh Poiblí nó arna shíniú thar a cheann nó thar a ceann, á rá—

(i) go bhfuil an t-ordú i bhfeidhm agus nár sásaíodh é, agus

(ii) gur láithrigh an cosantóir nó go raibh ionadaíocht aige nó aici ag na himeachtaí ina ndearnadh an t-ordú nó, murab amhlaidh an cás, cén dáta a thosaigh imeachtaí na cúirte agus cén dáta a fuair an cosantóir fógra ina dtaobh,

(c) tuairisc ghearr ar an iompar ba chúis leis an ordú a dhéanamh,

(d) aon fhaisnéis eile a éilítear leis an ionstraim idirnáisiúnta iomchuí, agus

(e) iarraidh go ndéanfar an mhaoin lena mbaineann a fhorghéilleadh agus go ndéanfar í a dhiúscairt.

59 .— (1) Féadfaidh an chúirt a rinne ordú forghéillte seachtrach é a tharchur chuig an Údarás Lárnach, nó féadfar é a tharchur chuig an Údarás Lárnach thar ceann na cúirte sin, in éineacht le hiarraidh chun é a fhorfheidhmiú.

(2) Beidh na nithe seo a leanas ag gabháil le hordú forghéillte seachtrach—

(a) cóip chuí-dheimhnithe den ordú,

(b) ráiteas ón gcúirt, nó thar ceann na cúirte, a rinne an t-ordú, á rá—

(i) go bhfuil an t-ordú i bhfeidhm agus nach bhfuil sé ina ábhar d’achomharc, agus

(ii) más rud é nár láithrigh an duine ar ina choinne nó ina coinne a rinneadh é sna himeachtaí lena mbaineann, go bhfuair an duine fógra i dtaobh na n-imeachtaí luath go leor le go bhféadfadh sé nó sí cosaint a dhéanamh sna himeachtaí,

(c) tuairisc ghearr ar an iompar arb é an cion é ba chúis leis an ordú a dhéanamh, agus

(d) aon aistriúcháin atá ag teastáil,

agus beidh aon fhaisnéis bhreise ann a éilítear leis an ionstraim idirnáisiúnta iomchuí.

60 .— (1) Féadfaidh an tÚdarás Lárnach, tar éis ordú forghéillte seachtrach agus doiciméid a ghabhann leis a fháil, a chur faoi deara iarratas a dhéanamh chun na hArd-Chúirte ar ordú (“ordú um chomhar i dtaca le forghéilleadh”) chun maoin inréadaithe sa Stát lena mbaineann an t-ordú forghéillte seachtrach a fhorghéilleadh.

(2) Beidh an iarraidh, na doiciméid a ghabhann léi agus aon doiciméid ghaolmhara eile, nó cóipeanna díobh, ag gabháil leis an iarratas.

(3) Tar éis an t-iarratas a fháil, féadfaidh an Chúirt, faoi réir fho-alt (4), ordú um chomhar i dtaca le forghéilleadh a dhéanamh.

(4) Ní fhéadfaidh an Chúirt ordú um chomhar i dtaca le forghéilleadh a dhéanamh mura rud é—

(a) go bhfuil sí sásta—

(i) go bhfuil an t-iarratas á dhéanamh le toiliú an Aire, agus

(ii) maidir leis na nithe a luaitear in alt 59 (2)(b),

(iii) gur iompar coiriúil an t-iompar ba chúis leis an ordú forghéillte seachtrach a dhéanamh, agus